稀思路/筆是機場
俄羅斯同烏克蘭嘅戰爭，牽起全球關注，其中一啲「關心世界時局」嘅香港人，之前仲有唔少聲稱「我們都是烏克蘭人」、「要聲援烏克蘭」等等；佢哋當中有部分人就被人批評濫抽水，請佢哋收聲。最近，英國廣播公司BBC有一則報道，指一名曾經歷黑暴運動、之後移居英國嘅青年，與香港一名註冊護士打算到烏克蘭參軍，不過喺最後階段「縮沙」。講真，打仗唔係打機，而且會隨時無命，如果有香港人因為「一時熱血」而投入戰爭，之後又因為個人考慮而退出，咁就未免太兒戲喇！
根據報道，現年25歲嘅Spencer同埋註冊護士Alice，上月底一齊聯絡烏克蘭駐英大使館；3月1日，Spencer同Alice兩位「從未真正見過戰場」嘅香港人，就飛抵波蘭第二大城市克拉科夫，經交涉後，烏方安排車輛從旅舍接送他們到烏國境內鄰近邊界的某軍事基地待命。二人仲草擬好遺囑，其中Spencer仲聲稱「我們決定起行，便有這樣的心理凖備，差別是要如何死去而已」。不過，當二人見到一份烏克蘭領土防衛外籍志願兵團參與者嘅「合約」時，由於「合約」訂明參軍有效期為服務限期係直到戰爭結束，二人就決定懸崖勒馬，自行折返波蘭。簡單嚟講，就係縮沙！
筆者唔知道，BBC呢個報道，算唔算係一個「嚴肅的笑話」，如果兩位故事主角已經有「死嘅心理準備」，咁投入戰爭直至戰事結束，有咩問題呢？佢哋係咪當打仗好似喺香港打工咁，交封辭職信，然後Hea一個月就走得？佢哋可能認為，投入義務工作，應該有權「隨時退出」，但係喺戰場上，如何隨時「退出」？倘若見到敵軍，會唔會同對方講一句「I resigned, let me go」就無事呢？仲有一點，就係故事主角話自己被人收起護照，既然想從軍，留本護照又做乜呢？唉，香港嘅攬炒分子搞抗爭、想加入戰爭，似係想玩遊戲多啲囉！
從一個自保、自私嘅角度講，兩位主角識得退出，唔可以話佢哋「錯」，因為喺香港，佢哋或者佢哋嘅攬炒同路人，面對執法而留手嘅香港警察，佢哋可以扮勇武；但真正上到戰場，子彈無眼，亦無人會呵護住佢哋，佢哋如果因為內心要「支援烏克蘭」，或者想喺公眾目光前「型」一下，但結果係會受傷甚至賠上性命，咁好明顯就係太衝動。筆者要恭喜佢哋，佢哋成功保住性命，但成為「國際笑話」，sorry，好難避免。
如果細心留意BBC嘅報道內容，會發現有一啲特別字眼，例如「如同當年香港那樣」、「生與死的思想鬥爭」等副標題，去抬舉他們；筆者唔肯定BBC「有幾了解」香港喺黑暴運動前嘅情況，知唔知香港曾被黑暴破壞得幾犀利，但BBC呢篇報道，如果想抬舉呢啲香港人，好明顯達唔到預期效果；如果想借機拉到香港問題，香港同烏克蘭狀況，好明顯亦係不能比較。不過，無論如何，大家都應該「多謝」BBC嘅報道，因為佢嘅報道話咗俾大家聽，有啲香港人，真係有如「溫室小花」，講就所向披靡，做就即刻 ... 永遠「有頭威，無尾陣」。
收藏
取消收藏
分享
