來論｜為「刷存在感」唱衰施政報告　民主黨實質反證難以挑剔

稀思路/筆是機場

喺面對一件事嘅時候，到底點樣可以證明呢件事做得好、得人心？首先，當然係如果自己友都批評，咁呢件事就做得「好極有限」；另一個角度，就要睇下對家、對手點樣睇件事，如果你嘅對手都搵唔到啲咩去抨擊件事，而要搵啲雞毛蒜皮嘅嘢去挑剔，咁就反證到你做某件事做得唔錯。特首李家超噚日發表任內首份施政報告，坊間普遍讚好，有啲人讚佢「搶人才」嘅措施夠果斷，有啲人就讚佢勇於去解決房屋問題；不過，凡事「唱反調」嘅民主黨，就聲稱報告「未有著墨如何修補社會撕裂」、唔諗點樣幫助留喺香港嘅人。筆者就諗，其實民主黨喺施政報告都睇唔到有好大問題，所以就喺撕裂、挽留人才以至防疫等，搵啲嘢批評囉。

睇傳媒報道，報道指民主黨係唯一一個「民主派政黨」舉行記者會回應施政報告，其主席羅健熙就認為，報告未有著墨如何修補社會撕裂，又稱喺14萬勞動人口流失嘅情況下，政府應該喺搶外來人才前先「止血」，話政府「唔諗點樣保留、幫助一啲原本喺度嘅人」。另外，民主黨又稱報告喺社福、勞工同教育政策著墨少，無提出即時幫助市民嘅短期措施。睇完民主黨嘅回應，可能大家都會有個感覺，就係民主黨對施政報告其實無咩大批評。

對於民主黨嘅質疑，例如關於撕裂嘅問題，其實我哋可以睇下依家嘅社會氛圍，的而且確，香港作為一個自由、多元社會，當然會有反對、質疑聲音，但依家嘅香港，社會氣氛已經大有改善，撕裂同互相批鬥嘅情況少見咗好多，筆者用自身經歷去講，如果喺三年前，筆者同朋友（黃人）講支持香港警察嚴正執法，肯定已經同呢個人無朋友做，依家呢？就算大家政治立場唔同，起碼唔少人都已經唔會逢政府必反；民主黨認為政府無修補撕裂，其實好可能只係佢哋自己仲有好強嘅「撕裂」心理。

至於民主黨話報告無提出即時幫助市民嘅短期措施，筆者想問下羅健熙，之前不論係退稅、派糖甚至派錢，會喺施政報告宣布，定喺財政預算案宣布嘅呢？以筆者記憶，大部分短期紓困措施，都應該係喺財政預算案提出，而鮮有喺施政報告宣布。民主黨呢種「無提出即時幫助市民嘅短期措施」嘅講法，似乎係誤解咗施政報告嘅作用，而搵啲嘢去批評施政報告咁；換個角度講，施政報告作為一份提出政策、施政綱領嘅報告，要求施政報告「包羅萬有」，似乎亦比較困難。

喺愛國者治港原則下，愛國愛港陣營要轉變，其他政見不同嘅政團，都應該有所改變，抱持「攬炒」、「盲反」思維，只會令自己無出路。民主黨喺施政報告公布後，選擇開記者會回應施政報告，當民主黨唔係擦存在感，民主黨其實仲係好想喺香港嘅政治圈生存；既然如此，點解唔試下擺脫以往嘅「盲反思維」，嘗試去肯定做得好嘅特首，或者係敢去解決社會問題嘅施政報告？坦白講，今次特首李家超提出嘅政策，不論係成立「共同投資基金」參與投資，以至推出「簡約公屋」為公屋輪候時間「封頂」，都係勇敢、創新嘅社會政策。香港依家嘅問題，其實唔係香港有「大撕裂」，而係仲有人或者團體，依然走唔出「對抗」嘅心理，總係覺得自己要搵啲嘢去「反對」。