稀思路/筆是機場
咩叫「搬龍門」？「搬龍門」就係當你話做一件事時，某人批評你；然後你按實際情況調整而做另一件事，某人都係批評你，某人其實唔係講理據，而係「盲反」，總知就係要反對你。近日睇新聞，大家都知道內地同香港就快通關，對於苦等接近三年嘅香港市民而言，無消息比通關來得更重要，不過呢，網上面就有好多陰謀論者，處處質疑內地放寬防疫以至將容許通關。問題嚟喇，唔通關啲人批評，依家可以通關啲人又批評，咁即係「點都要鬧」，呢種人嘅存在，可能就係要「反對、反對再反對」。
攬炒派分子有個特性，就係佢哋反對一件事嘅時候，會扮到「好理性」、「好有邏輯」，對於今次內地放寬防疫措施，佢哋當然亦喺度扮「深度分析」，主要論點，就係質疑點解內地遲唔開關、早唔開關，疫情再起時先「開關」呢？表面上，佢哋講到懶有理據咁，其實佢哋流於表面嘅講法，忽略咗科學事實。
的而且確，內地開關或者放寬嘅時間比其他地方遲，但係遲係早係適當，唔係啲人用自己諗法去講就等於啱，而係要聽專家嘅科學判斷。大約喺半個月前，中國工程院院士鍾南山出席講座時，就指出2009年世界範圍內爆發甲型H1N1流感，中國大約有12萬人感染，死亡率為0.6%，數字算係相當高；而依家Omicron致死率只係0.1%，相當於普通季節性流感，所以佢認為不再適合叫新冠肺炎，應該改稱為「新冠感冒」。
其實內地嘅防疫政策，一直係睇住疫情變化包括新冠嘅重症以至致死率嚟制定，當內地睇到新冠病毒嘅傷害性減低，因而調整防疫策略，係對人民性命負責任嘅政府嘅應有做法；筆者反而想質疑，點解外國放寬嘅時機就係「啱」，而中國放寬嘅時機就係「錯」呢？一個合理嘅解釋，可能係有人崇洋，以為外國做嘅就係「啱」，內地做嘅又係「錯」囉，呢種唔係客觀或者科學嘅判斷，而係出於政治立場嘅判斷。
老實講，內地開關一個重要意義，對香港嚟講，除咗係香港市民可以返內地探親、工作或者處理急務，仲包括香港經濟需要內地旅客，睇返過去數字，2018年（黑暴前一年）內地旅客就有5103.8萬人，香港嘅零售業、飲食業、運輸業等，唔少人都係依賴內地客工作；當有人擔心內地人嚟「搶物資」嘅時候，但啲人又唔講內地客帶嚟嘅經濟效益，又係「好嘅唔講」，呢種說法，對內地客唔公道，對香港經濟更無益處。
有啲盲反分子嘅諗法，筆者相信不論情況如何，都好難改變佢哋嘅固有思維，筆者想講，香港要發展，一定係融入國家發展大局，有人要喺黃色圈子「圍爐取暖」，呢個係佢哋自己嘅問題，但如果佢哋抹黑內地，影響到兩地關係，甚至係影響到其他香港市民嘅生計，咁就令人難以接受。黑暴運動過後，仲有個別人士或者所謂新聞平台借住「反中亂港」嚟吸引注意，但從根本睇件事，如果今日仲有人靠販賣「反政府」嚟搵食，係咪有啲「過時」呢？有時候，我哋要批評一件事，可以搵到「唔同角度」，但如果咩事都係「負面地看」，其實對自己以至對社會，都只係有害無益。
相關看點：
收藏
取消收藏
分享
