點新聞 ｜ 每日點新聞 點解香港事

不少黃絲早前頭腦發熱，個個一家大細撲住去移民英國，以為是世外桃源，到埗後卻發現不適應新生活，隨時搞到小則家嘈屋閉，大則妻離子散。近日就有移英人妻嬲爆話，老公成日一個飛咗返香港，新年流流，剩低佢和兩個細路孤零零在英國過年，越諗越淒涼咁話。

有網民在港人移民討論區分享女友人嘅辛酸經歷，話說人妻一家去年到英國，老公搵唔番本行，去咗做倉務員，返咗三個月藍領。然而，落地九個月，老公已經第二次飛返香港。第一次係上年9月，話要返香港處理銀行戶口，細路仔返學放學要人湊，又唔想突然請假，就話不如自己一個人飛。點知，佢居然回程時，飛咗去日本玩多一個星期至返英國。估唔到上個月，老公又以父母年紀大，孤零零過年好淒涼，所以又買機票返港，陪老人家過年。不過，老公返港後只顧和朋友吃喝玩樂，早兩日仲去埋澳門㖭。

人妻嬲爆話「一家人在英國第一個農曆新年，有乜理由丟低佢和兩個仔，自己飛返香港？」她還勁呻「一家人嚟咗英國，屋企無咗姐姐，已經做家務湊仔做到無停手，以前有乜唔開心可以返娘家搵幫手，而家乜都要靠自己」，直言「再咁落去，佢就帶埋兩個仔返香港」喎。唉，路係自己揀，衰咗唔好喊囉。