一年一度的香港影壇盛事「第41屆香港電影金像奬」頒獎禮已圓滿落幕，今屆金像獎戰況激烈，嘉賓和獲獎者在台上大放笑彈之餘，又有不少溫馨感動時刻。讓點新聞帶你一同回顧本屆金像獎，那些星光熠熠、群星璀璨的珍貴時刻！
《給十九歲的我》導演張婉婷缺席 聯導代致辭「今生無悔」
「第41屆香港電影金像獎」最後揭曉的「最佳電影獎」，一如點新聞所料是由導演張婉婷執導的《給十九歲的我》奪得。該片上映時因未獲部分主角同意公映引起爭議，其後暫停公映。導演張婉婷缺席頒獎禮，聯合導演郭偉倫及工作人員等一同上台領獎。
郭偉倫在台上先多謝《十九歲》的靈魂人物張婉婷，然後讀出張婉婷交給他的致謝辭。郭偉倫說：「過去一段時間，由羅啟銳死亡的黑洞到《十九歲》面世，瞬間令我躲進一個可以種美麗植物嘅小花園，再因為一場風波，將我一頭掉進一個漆黑嘅森林。這一切，令我領悟到人生嘅無常，但係坂本龍一臨終嘅一句說話，畀好大嘅啟發。『藝術千秋，人生朝露』，多謝呢段時間仍然給我支持同鼓勵嘅人，多謝業界對呢部電影嘅肯定，令我喺黑暗當中漸漸見到曙光，讓我知道雖然人生處於低谷，但仍舊意味着前路只有向上嘅可能性。感謝石校長交畀我哋呢個任務，我哋今生無悔，感謝所有參與拍攝嘅同學們，感謝你哋面對自己，面對觀眾嘅勇氣，感謝10年來同我哋同甘共苦嘅團隊。人生有幾多個10年呢？可以畀大家追逐一個夢想，一齊面對高山低谷，最寶貴嘅係呢10年嘅磨練，令我哋成為莫逆之交。」
91歲媽媽看到得獎 韋家輝首獲最佳導演獎分外開心
韋家輝憑《神探大戰》在今晚金像獎除獲最佳編劇外，五度提名最佳導演的他，首度獲此殊榮。韋家輝在台上由許冠文手中接過獎項，便說：「真係好感恩，感謝神﹑感謝大會﹑感謝楊受成老闆，感謝好優秀演員，感謝我嘅團隊，呢個獎唔係我一個，係我成個團隊，好多謝好友杜sir（杜琪峯），最後我要多謝我家人﹑我老婆﹑我個仔同我媽媽，我媽媽今年91歲，同修哥（胡楓）一樣，好開心喺媽媽91歲時，見到我攞呢個獎。」
再憑《神探大戰 》獲獎 劉青雲金像獎三度封帝
劉青雲憑《神探大戰》大熱稱帝，這是他繼2007年《我要成名》及2015年《竊聽風雲3》後，第三度在《金像獎》獲得最佳男主角。劉青雲在台上說：「好多謝楊生（楊受成）投資者，同埋台前幕後，陪我度過好多個孤獨嘅晚上，多謝幾位漂亮嘅女孩子幫我搵呢件戰衣，仲有我太太同我嘅團隊，佢哋一向都係神探，用咗一般人未必能夠忍受嘅能力去工作，一日接受一次核爆，如果大家有夢想，只要肯努力，夠長命，夢想就會有一日，好奇怪亦帶點遺憾咁去實現，不過，唔緊要世事豈能盡如人意，我仲要多謝鏡頭前嘅大家，熱愛香港電影、熱愛香港嘅朋友，掌聲、噓聲我都會接受，因為總好過無聲。」
封后沒公開多謝許志安 鄭秀文不再陪跑
10度入圍香港金像獎、7度入圍影后的鄭秀文，在今晚終於「開齋」封后。鄭秀文在台上多謝一同角逐獎項的對手，包括張艾嘉、毛舜筠、蘇玉華及袁澧林。鄭秀文指最佳女主角對她來說一直都好像遙不可及，但有時又覺得好似一步之遙：「咁多年我諗得最多唔係我幾時可以攞到呢個獎，而係我究竟點先可以進步，點樣喺演技上可以有提升、蛻變。」鄭秀文又激動表示：「我真係好開心，我今次終於唔使企喺個賽道默默陪跑，我終於可以衝線，我係衝線嗰個呀！多謝你哋！」
Sammi從好友劉德華手上接過獎座，非常激動，致謝辭一度哽咽。她多謝該片導演及幕後人員、家姐、家人、弟弟及媽媽，她頓一頓再想說話，原來是鼓勵大家繼續追夢，始終沒在電視機前多謝老公許志安。最後她也效仿胡楓哼了《我等到花兒也謝了》兩句歌詞，然後開心落台。
終身成就獎不是終結 胡楓下一站最佳男配
資深藝人胡楓在今屆香港電影金像獎榮獲「終身成就獎」，由藝人薛家燕頒發，他上台領獎時，全場站立並報以熱烈掌聲，他說紅館的掌聲令他興奮，但在這頒獎禮給他的掌聲，是感動莫名，因給他掌聲的全是電影界精英。現年91歲的他，說21歲入行，不知不覺至今已70年，但感覺像是只過了數個月。
胡楓說當初投考演員時因「漏口」曾被質疑，但最後試鏡成功，成功進身演藝圈，笑言自己是紀錄保持者，跟無數花旦包括陳寶珠及蕭芳芳等合作，無人能及外，又稱向來被讚人緣好，是因有與世無爭的心態，他覺得「有麝自然香」。他更玩食字，說很多人認為他應一早奪此獎：「但我覺得唔緊要，一個一個順序嚟，我係『序』有應得！」更唱契仔張學友的歌曲《我等到花兒也謝了》，搞笑應景！
胡楓受訪時會同家人及朋友食飯慶祝：「有朋友話如果可以燒炮仗會燒一串好長畀佢，非常開心，預計起碼慶祝3、4次。契仔契女呢？唔知學友知唔知我攞呢，唔知我就提吓佢，家輝去咗第二度拍戲，佢拍完返嚟會搵我，憶蓮就在遙遠的那方，佢祝我得到呢個獎。係咪繼續拍戲，永不言休？咩唔拍戲，終身成就獎唔代表結束，係代表繼續向前，希望做演唱會同拍戲，可以得到最佳男配角，我會繼續努力。」
王菀之兩度獲最佳女配角
「最佳女配角」一獎，競爭相當激烈，最終由《飯戲攻心》的王菀之奪得。2015年曾奪得過該獎項的她，今次是第二度獲獎，王菀之可能始料不及獲獎，上台即大嗌一聲，並笑言：「多謝大家，同埋《飯戲攻心》整個Family，亦好多謝導演畀我加入呢個家庭。」王菀之笑指自己有時都會問自己是歌手定演員，很感謝大家畀機會她，令她可以接近夢想，當然也要多謝家人以及支持她的歌迷，亦希望若果她有影迷的話，都可以支持她拍戲。
首獲男配角獎勁興奮 許冠文：未攞過
「第41屆香港電影金像獎」的最佳男配角，由影帝級的許冠文憑《風再起時》獲獎。首奪最佳男配角的許冠文在台上說：「今晚特別興奮，一世未攞過唔係搞笑嘅獎，當我係新人感覺，多謝岑建勳監製，我特別高興《風再起時》攞到八項提名，我特別開心，今晚興奮到唔知講乜好，翁子光導演同我講，有一個Take直落10分鐘英文，拍咗10分鐘，一個笑聲都冇，我唔習慣，我問副導演，導演（翁子光）有冇笑過，佢話冇，不過恭喜你，佢喊緊。」許冠文表示這個獎啟發同行兄弟姊妹：「只要你夠膽試新嘢，任何奇蹟都可發生，包括呢個咁珍貴獎，多謝大家。」
吴思遠代領 石琪虛弱缺席金像獎
今屆奥斯卡增設專業精神獎，由寫影評的羅卡及石琪獲得，並香港電影導演會永遠榮譽會長吴思遠頒獎。
羅卡表示：「我能夠得到呢個獎，係感到非常榮幸。我要衷心感謝大會，感謝一向支持、愛護我嘅親朋戚友，同埋感謝同我一齊做過好多嘢嘅工作伙伴。我已經退咗休差唔多20年，但係日常能力所及都要做一啲同電影文化有關同有益嘅嘢。我好希望比我年輕嘅一代，或者係更新嘅一代，繼續增進香港嘅電影文化，努力落去，多謝各位﹗」
吳思遠代石琪說：「多謝電影金像獎史無前例將咁貴重嘅專業精神獎頒畀電影文字工作者，佢覺得非常欣慰﹗佢話其實要多謝喺半個多世紀以嚟嘅香港電影人，係佢哋拍咗無數嘅好電影，各種類型、各式各樣嘅電影，令佢有機會喺電影院一部一部欣賞，然後將電影記錄落嚟成為文字。呢一段美好嘅時光，佢永遠記住。另外，佢話香港電影唔單止喺香港成功，係影響咗成個東南亞，甚至喺國際電影壇上有一席之地。所以，佢叫我今晚特別要向各位電影工作者，尤其係新一代嘅電影人，運用你哋嘅豐富想像力，天馬行空拍出更加好嘅香港電影，令香港電影再顯光芒﹗」
最佳新晉導演 何爵天：香港電影不會死
許鞍華頒發最佳新晉導演，頒獎前她說：「今日許多人問我，今年電影同去年電影相比，今年電影是台出現了小陽春。我說不是小陽春，因這班新導演好成熟並在持續進步，其實現時有十幾位新導演，但入圍5位（名額）太少了、好可惜。今屆得主是何爵天。」
何爵天上台領獎多謝監製翁子光，更言香港並非出現小陽春：「香港電影有排都未死。」他又言他日希望可以同黃秋生、梁朝偉及劉青雲，想同大明星合作，期望可以在他們身上學到東西。
（點新聞特約記者陳惠芳報道）
更多報道：
收藏
取消收藏
分享
