點新聞 ｜ 每日點新聞 點解香港事

【點新聞報道】話說移民英國嘅港人喺英國買樓收租，不但令當地樓價被炒高，近有更被指「唔熟唔食」，專呃港人！近日有網民在社交平台貼出租盤，「放租」一間位於伯明翰雪利區的三房獨立屋，但卻被一眾網民狠批租金昂貴，鬧爆「香港人坤香港人」、「食相好難睇」、「見到都心寒，幫自己人喎」。

該名網民在fb群組「港人移英生活」貼出租盤，出租一間自己位於伯明翰雪利區的獨立屋，稱三房兩廁所交通方便，10分鐘步行到超市「Sainsbury」，15分鐘到大型購物區、Solihull 校網、不提供傢俱、寵物友善、不可吸煙，月租£1,520（約14,916港元）。樓主還上載了單位內的照片，可見部分地磚、地氈都有使用的痕跡。

結果帖文一出，即惹來大批移嘅英網民開火，有人批評單位租金太昂貴，廚房冇煮食爐、焗爐、抽油煙機、雪櫃等電器，而一般英國租盤均會提供以上電器，質疑樓主為了「賺到盡」而減省基本生活設備。

有網民更大呻，港人業主喺當地放租嘅價格高於本地市場5-20%，稱「大把同一個盤，香港人價比rightmove貴一百至百五鎊」；有網民更貼出與樓主差不多地段的租盤，月租£1,298（約12,800港元），比樓主開價平之餘，裝潢更企理；有人就恥笑樓主「Solihull 校網」在鄰區，根本無法報讀，居然還當成賣點。