稀思路/筆是機場
西方陣營嘅國家，一直都以正義之師自居，但佢哋嘅「正義」係咩呢？就係人哋無事，屈人哋有事；自己做壞事，就當無件事，厚顏程度，超乎想像。近日，東京電力公司發表報告，上個月喺福島第一核電廠港灣內捕獲嘅海魚「許氏平鮋」，體內嘅放射元素超標，其中「銫」更加係超標180倍，即係喺福島一帶嘅海魚，可能都係非常之「毒」，其他國家或者地區，真係多得日本唔少！
理論上，其實日本政府係未正式將污水排出太平洋，佢哋想將經稀釋處理嘅核污水排出太平洋，海底隧道都已經起好，計劃先注入海水，海水量係6000噸，然後將稀釋處理嘅污水透過隧道再排放到大海。呢個做法好似好科學，日本等已經有專家做過種種評估，但有個好大嘅問題，依家未正式排放核污水，附近嘅魚已經咁「毒」，如果日本真係開始排放污水，仲得了？雖然福島係面向太平洋，但有邊個咁肯定，自己居住嘅地方唔會受到影響？
日本堅決要排放污水，筆者真係要非常認真地同讀者講，所謂核廢水或者污水，唔係一般廢水污水，係毒到隨時毒死人嗰隻，「銫」係核爆炸或者鈾燃料元素分解之後嘅產物，人體體內或者生活環境附近有高濃度嘅「銫」，可以噁心嘔吐出血，嚴重嘅可以死亡；其實喺今年2月，福島附近海域就有魚類驗出銫-137含量超標，於是當地嘅鱸魚暫停上市，福島本身亦有海產之前驗出「銫」超標而禁售。
老老實實，日本嘅做法，就係將自己本身要負責嘅事或者風險分攤出去，要全世界，或者至少要所有太平洋一帶嘅國家「一齊負責」，日本官方說法，大概係稀釋咗嘅核污水，大致係安全嘅，呢種說法大有問題，第一係如果核污水稀釋就會安全，日本做乜自己唔儲起啲污水嚟「留念」？仲有，如果未正式排污水，福島附近就咁多「毒魚」，當啲污水真正排出太平洋，到時太平洋會唔會變做「核廢洋」？日本以至友好國家嘅專家，可以做到啲研究、報告「好靚仔」，但筆者睇事實，就係核污水未排放，我哋已經見到「好毒」，所以日本嘅行為，必須反對，大力譴責。
筆者知道，香港人都好鍾意去日本，筆者唔係叫讀者唔好去日本（唔少人當日本係鄉下），而係讀者如果喺今個夏天之後去日本，面對茨城、栃木、千葉、群馬等地方嘅海鮮，係咪都要食，仲要食完講句oi shi i（好吃）呢？有啲人覺得日本好，筆者認同日本可能建設得唔錯，但日本人嘅心腸，真係心照不宣。
收藏
取消收藏
分享
