來論｜香港國安法三周年　攬炒分子仲玩抹黑？

稀思路/筆是機場

香港國安法實施就嚟三周年，唔需要筆者多講，讀者都會感受到香港國安法嘅力量，本來仲未平息嘅黑暴運動，因為國安法而止息；本來十分氣焰嘅攬炒派，最後能夠攬炒嘅只有自己。正當有傳媒喺度回顧香港國安法嘅正面力量時，攬炒分子或者傳媒，當然係企喺相反角度睇國安法啦，筆者都睇到篇報道，聲稱中央如何利用國安法「迫害」港人，不過，呢篇所謂報道或者專題（拍埋片），錯漏百出，引人發笑，講真，要抹黑國安法，可唔可以認真少少，唔好隨口講就當係先得呀！

一篇由台灣yahoo轉載，新聞來源應該係《鏡新聞》嘅報道，真係「不得了」！首先講到香港國安法頒布令「離散成了香港的新日常」，抹黑味道十分濃厚，然後筆鋒一轉，就有句「今年七一修訂的《反間諜法》，外國企業營運風險大增」，筆者真係充滿問號，《反間諜法》係咪講緊中央修訂嘅《反間諜法》？香港好似無相關法例通過喎！仲有，如果係講《反間諜法》，其實應該係中央喺今年4月26日表決通過，今年7月1日起施行，而唔係「今年七一修訂」，抹黑中央嘅事讀者都見唔少，但唔係咁唔認真呀？

呢篇報道嘅內容，訪問嘅基本上都係反對中央嘅人，即係呢，要問人關於香港、香港國安法以至中央嘅事，佢哋唔係問喺香港嘅市民，而係問已經移民或「走佬」嘅人，咁呢度絕少部分嘅人，可以代表到香港聲音？例如佢哋訪問其中一個人，係前《蘋果日報》員工，咁真係唔需要問，對方立場都好明顯啦。

其實，讀者唔需要睇佢哋訪問，或者只需要知多少少佢哋嘅受訪者背景，基本上成個故事就出晒嚟，佢哋其中一個受訪者「桑普」，筆者睇佢喺其他媒體嘅訪問，佢講過「香港沒有獨立的主權 ... 連自由、人權、法治都凋零殆盡」等等，唔好玩啦，香港從來都無主權，主權一直在中央即係中國手上，講香港「無主權」，係咪一種偽命題？而自由、人權同法治，香港唔係無，而係香港同其他法治社會一樣，都無犯法、攬炒以及危害國家安全嘅「自由」。

香港社會嘅評論，有唔少都用定海神針嚟形容香港國安法，因為香港國安法一實施，基本上攬炒派再危害國家安全就好可能要受到法律制裁，呢三年來，香港嘅穩定、安全以及發展係有目共睹嘅，有人離開咗香港，選擇用抹黑嘅方式去對待香港國安法；但筆者想掉轉問問，如果無國安法，香港繼續亂，社會治安差，市民連基本出行安全都受威脅，呢班人所講嘅「自由、法治」，有咩意義？

仲有，黑暴運動期間，攬炒派唔係講好齊上齊落咩，當部分後生仔出嚟衝而受罰時，呢班人做乜走咗去？黑暴運動時，無論攬炒派點美化件事，黑暴本質就係暴動，一班有份支持暴力行為嘅人走咗去其他地方，然後喺度放「嘴炮」？違法嘅人應該要受罰，但喺旁邊推波助瀾，然後走去外國過「新生活」嘅「手足」，更乞人憎！