稀思路/筆是機場
英國開放BNO「5+1」計劃，有啲香港人視為「恩賜」，覺得英國政府開條路畀佢哋，等佢哋可以擁抱「自由國家」，呼吸「自由空氣」；不過，呢個世界係冇免費午餐嘅，移英黃絲以為英國對部分香港人好好，其實人哋根本就當你係羊牯，開放BNO計劃，好可能只係一盤生意，最近，英國首相蘇納克宣布將會大幅調高移民簽證申請費，連帶移民保健附加費（IHS）都會大增，成件事好明顯就係攞有意移民嘅人開刀，筆者真係想知道，今日移英黃絲畀人「攞一筆」，他日又唔知要喺咩地方「嘔一筆」，咁搞法，會唔會好似英國啲本土市民咁，食都食唔飽？
表面上，移民簽證申請費加啲啲，IHS又加啲啲，可能有人以為唔係大數目，但呢個諗法絕對係錯嘅，如果有移英黃絲、一家三口想移居英國，兩大一小，按新規定申請5年BNO同繳交IHS，埋單計數，大約係14.5萬港元，比之前貴咗接近6萬港元；蘇納克就表示，佢唔會以加稅、發債等做法彌補政府開支，所以呢，英國政府就向提高移民相關費用入手，表明「這些費用上漲會帶來逾10億英鎊（約102億港元）收入，所有費用都會全面增加，IHS也是如此。」
其實，筆者非常理解英國政府要咁做，英國經濟根本就唔好，冇錢開暖氣、冇錢食飽飯甚至失業冇工開嘅英國新聞不絕於耳，本身唔多掂嘅英國政府，仲要諗方法撥出公帑為公務員加人工，加稅會影響經濟，發債可能冇錢還，咁向咩人開刀最好呢？咁梗係一班明知英國經濟唔好仲要移民去嘅羊牯啦！
要分析移民費用增加對移英黃絲嘅影響，講真係有啲難，或者咁講，相關費用增加對移英黃絲嘅影響，係「因人而異」嘅；喺香港，有一班本身有樓有錢，賣晒樓同資產去英國生活嘅人，幾萬元至10萬元嘅移民費用，真係唔係咩大數目；但係呢，其實香港仲有一班移英黃絲，本身喺香港都係「窮開」嘅，佢哋去到英國本身搵食同維生都難，如果連移民費用都幾萬港元起跳，呢班人到底點生活？真係好問題。
世界在變，英國也在變，英國政府要增加移民費用，可能仲未係最絕嘅招數，如果有一日英國政府立場改變，所謂BNO「5+1」政策，會否等啲黃絲住夠五年申請定居時「落閘」，或者附加條件先可以真正定居，無人知；而呢幾年，筆者覺得唔係考驗緊移英黃絲有幾適應英國嘅生活以至天氣，而係佢哋嘅財力支持到幾耐。依家睇新聞，已經有唔少移英黃絲回流香港，筆者預計之後會陸續有嚟，因為喺香港能夠謀生，同喺英國能否生活，根本係兩回事。
網上面有人講笑話，等啲移民英港人完全冇利用價值時，可能會畀人一腳踢去盧旺達，筆者相信呢個情況唔會發生，英國人玩政治始終有一手，佢哋如果有一日唔想移英港人留低，最可能嘅做法，就係令部分移英黃絲「知難而退」，定居申請處理慢啲，關卡設置多啲等，都有可能。近期有亂港分子政治庇護申請唔到，想轉申請BNO計劃又唔得，其實已經係一個警號，只係一群「在溫水中的青蛙」，仲未意識到咩事啫！
收藏
取消收藏
分享
