稀思路/筆是機場
前兩日，筆者喺報紙睇到單新聞，話因為中大校董改組，引發咗提出修例嘅立法會議員同其他校友「罵戰」，呢個話嗰個喺改組方案「僭建」，另一個又話返對方先係「僭建」，中大校董改組，畀人感覺就係有啲複雜，唔少讀者都唔係好清楚咩事，又唔知道中大校董改組關其他市民咩事，今日，筆者就想同大家簡單講下，點解中大校董要改組，同埋點解非改組不可。
要為中大校董改組搵個源頭，其實好簡單，就係黑暴兩個字！如果讀者仲記得黑暴運動，應該仲記得2019年黑暴運動時，中大成為咗一個戰場，呢個戰場係由一班暴徒製造出嚟，佢哋叫呢次大暴動做「中大保衛戰」，事件引起社會甚至國際嘩然，而令人更嘩然嘅係，以中大校長段崇智為首嘅中大管理層，竟然係幫暴徒多過幫警方，所以曾經有一段時間，中大學生叫段崇智做「段爸」，呢個稱呼好warm，但係講清楚，其實係講緊段崇智狀似包庇暴徒甚至犯罪學生。
講到呢度，可能會有人疑問，咁中大出咗唔少暴徒，甚至畀人叫做「暴大」，唔係段崇智佢哋掟汽油彈、襲警，點解立法會議員要提出修例，改組中大校董呢？咁係因為，中大完全無皇管！發生連串暴動，段崇智撐暴（或者至少係曖昧地批評警方），理論上無可能留低，偏偏之前明明距離佢合約完仲有一段日子，中大校董會竟然同段崇智續約，反對嘅就係三名身為校董嘅立法會議員，即係一間大學嘅校董會，好多都係校長嘅人（教職員等），咁社會點監察中大校長等管理層呢？
中大混帳嘅事，數落未必多，但一定唔少，段崇智突然續任係例子，有專欄作家就直斥，中大醫院爭政府錢未還，校長唔上立法會解釋；中大無端端改校徽，有校董唔知情；校董會主席查逸超承認曾在未獲通知下，有人繞過佢制訂議程；另外佢亦指曾向秘書處查詢，有關校長薪金同獎金資料，都未得到充分資料。一間用公帑營運嘅大學，連校董會主席都好似無權管理或者過問佢哋嘅事，面對段崇智，筆者只想講一句，「好大嘅官威呀段校長！」
依家由立法會議員提出嘅改組校董會等，一個核心部分，就包括將校董會嘅成員人數減少約三分一，重組後嘅校董會校外成員佔大多數。近日，有人發起聯署反對方案，有人搬出院校自主、中大傳統等理由；但其實，中大校董會要改組，就係因為過往給予中大充分嘅自主權，先出現中大暴動，「中大變暴大」，繼而發生一連串中大管理層自把自為嘅行為，公帑攞到足，但又唔想畀公眾包括立法會議員監察。
如果立法會通過咗相關條例，中大以至中大管理層受到更大監察同制衡，唔單止合乎公眾利益，筆者坦白啲講句，中大如果以後仲要聘任、續任段崇智之流，公眾包括立法會議員都唔會「得個睇字」；如果中大以至校友要問立法會議員點解要修例，其實應該問下自己，過去幾年中大發生過咩事，而中大管理層又做過啲乜，咁樣，會公平好多。
收藏
取消收藏
分享
