【點新聞報道】MIRROR「人氣王」姜濤首個個唱昨晚（5日）圓滿落幕，全場座無虛席，姜濤唱出寫給已故好友的《Dear My Friend》時不禁淚流滿臉，又約定大家明年見。
姜濤唱跳全場，但到中場已滿身汗水，妝容溶化。肥仔梁業上台時，急忙準備好化妝掃，即場為姜濤補妝及清潔。當二人唱跳《特務：肥姜2.0》，炒熱全場氣氛。及後姜濤唱出寫給已故好友的《Dear My Friend》時忍不住淚流滿臉：「今次係我第一次開演唱會，我相信呢位朋友今晚一定在場！」
到Encore環節，姜濤感性表示：「咁快嚟到第4場，希望以後每年都有咁嘅場合可以同大家一齊放電。」唱完《蒙着嘴說愛你》，姜濤未有講再見便返回後台，全場不停尖叫狂嗌，姜濤再踏舞台說：「我真係唔知咩係第二次encore，細個冇錢睇演唱會呀。」他再唱《123我愛你》及《一天多一點》，便為演出畫上句號，離開前突拋下一句「下年見」。
姜濤完騷後受訪，直言完成所有演出感覺如釋重負，他給自己75分，覺得再有進步空間。他說:「大概一、兩個月前已經開始準備，但我一直想不到主題，因為我由細到大好少睇演唱會，所以冇乜概念，後來覺得自己好傻，原來搵咗咁耐主題就係我個名入面。」他又坦言尾場演出絕對不是表現最好的一晚：「今晚喺經驗同體力方面都生疏咗少少。其實首場瑕疵比較多，第二場體力同調整方面就比較好，第三場有啲失誤觀眾未必知。」
對於頭場嘉賓林海峰「預言」明年一月一日姜濤「有大獎」，姜濤笑答：「無去諗有冇獎，做得好自然會有。」談到偶像羅志祥任嘉賓？他說:「之前喺馬來西亞演出，見到佢已經同佢講。佢講咩我都聽。今晚我完成咗兩個夢想，除咗開演唱會之外，仲可以同佢同台演出。（你見到佢仲係小粉絲心態？）係，我同佢綵排時緊張到成身汗。（你哋成日聯絡？）係，不過好少見面傾偈，我哋有WhatsApp。
至於完場前講「出年見」，他打趣：「耳機有人同我講，叫我講下年見，我咪講囉。（希望每年都有個類似嘅演出？）係，我淨係想開騷，開到已經好好，對乜場地冇乜要求，當然愈大愈好啦。（你媽咪好風騷喎。）唔好再提喇，佢開心就得，我控制唔到佢，哈哈！」
（點新聞特約記者陳惠芳報道）
相關報道：
（有片+多圖）姜濤瘦身開騷狀態勇 回顧《濤》《作品的說話》等現場（附歌單）
收藏
取消收藏
分享
