【點新聞報道】34場容祖兒演唱會《MY SECRET LIVE》已經唱了19場，祖兒病愈後愈唱愈勇。上星期便有不少圈中好友前來捧場，繼有Tyson Yoshi、Jeffrey（魏浚笙）、林家謙、甘比、李嘉欣、Yumiko（鄭希怡）及女兒梁浸浸，黃伊汶及兒子陳真等等。每晚的點唱及安歌部分，祖兒都跟歌迷大合唱，氣氛熱烈，昨晚（13日）大合照時，更是扮zombie跟觀眾大合照，非常搞笑。
為了不讓已購票觀眾失望，祖兒把本來安排好的休息期也放棄，用作補場，所以每日除了用盡能量台上唱歌之外，她便馬上回家休息，而後台亦不再可以跟來訪的朋友打招呼，免得人來人往一不小心再受感染，「好多謝來睇騷所有朋友，不過公司驚我再病，所以就嚴禁我喺後台太開心，冇得同來睇騷朋友影合照留念囉。好在朋友都明白同體諒，完騷入唔到來影相，但都有send短信比我打氣，好溫暖同感動。」
最近好多歌迷都指她太瘦，叫她要多吃點東西，「依家51公斤，竟然係5年前做Pretty Carzy演唱會個磅數呀，好Crazy…已經都冇諗肥唔肥㗎啦，早午晚三餐，下午茶，完騷之後返屋企媽咪仲有宵夜，我食得落我都照食晒，因為我知道大家都唔會care我肥瘦，依家最緊要係有體力，身體健康，所以大家不用擔心。」
台上她又搞笑問大家，「做咗廿四年歌手，係咪冇歲月痕跡？睇下條馬甲線……係咪好fit呀？喺社會做咁多年嘢，我仍然相信世界係充滿色彩，相信世界係善良及好有希望同美好。之前有段日子，冇辦法要離開香港工作，錄咗首新歌都冇辦法返來宣傳，同大家講下我對呢首歌感受，個陣自己喺跑步機上聽自己首歌，流咗兩滴眼淚，首歌比咗好多力量我，叫我唔可以放棄。我真係冇諗過首歌竟然不返來宣傳，都可以得到大家厚愛，五台兩星期連續雙冠軍，連Viu TV我都冇去過，都係兩星期雙冠軍，應該係我人生史上第一次咁好成績。一定會係舞台上同大家分享呢首歌：《東京人壽》。呢首歌教會我活在當下，珍惜現有，珍惜身邊一切。」
此外，昨晚在talk位時，祖兒笑講到多朋友都戥佢着急，「佢哋成日話，我再唔搞就冇得生架啦！」觀眾大叫，「點搞先？搞咩先？我係到呀，結婚啦……」引爆全場笑彈，祖兒聞言忍笑答，「唔係呀，即係『搞掂』佢呀，哈哈哈…呢度好色情呀…我企返後d先，哈哈…」她又自爆擇偶條件，「其實我要求好簡單，只係希望五官端正，身家清白，有頭髮…點解咁難搵？所以我覺得一定係我心態問題，於是我同自己講，唔好諗咁多啦，打開個胸圍…打開個胸懷先係…哈哈哈……」錯將「打開胸懷」講為「打開胸圍」，又引發全場大笑。
下星期五（18日）祖兒會同步為她的善慈基金籌款，於演藝學院由18日至20日，設《容祖兒善慈義賣會》，連同身邊的好朋友一起進行斷捨離，把用過一次半次，甚至沒用過，冇穿過的新衫、褲、鞋、手袋、飾物等等，拿出來義賣籌款。祖兒表示，今日開始已經叫晒公司兄弟姐妹，及身邊朋友，一齊參與呢個斷捨離活動。
（點新聞特約記者陳惠芳報道）
相關報道：
收藏
取消收藏
分享
