稀思路/筆是機場
N年前，網絡上有一篇潮文，雖然話自己睇過呢篇潮文會暴露筆者年紀，但筆者都想分享下，呢段潮文嘅中心思想，就係話一個人自己「儲咗5萬元，加埋屋企人畀嘅600幾萬元，終於夠錢買林寶堅尼」，呢個故事真係「好勵志呀」；呢段潮文講咩，其實佢嘅意思，就係話某啲人唔應得但偏偏得到某樣嘢，情況套落潛逃香港嘅攬炒派政客身上，道理都可以通用，被警務處國安處通緝、人稱「癲鴿峯」嘅許智峯，竟然喺澳洲成為律師，呢個唔止係澳洲法律界嘅大笑話，筆者話佢「勵志」，其實係講，許智峯應該得到嘅唔係律師頭銜，而係返嚟香港坐監先真！
其實睇新聞內容，讀者會知道澳洲嘅律師會作出嘅決定，有幾唔合理，甚至係幾荒謬，因為許智峯自己都透露，佢向澳洲嘅律師會同法庭申報喺香港涉及嘅各項刑事紀綠，裏面就包括23條控罪同7項通緝令，但佢「仍然」被裁定有良好品格，喺南澳洲最高法院宣誓後，獲法庭頒令正式認可佢為律師。
通常出現呢啲情況，以許智峯嘅性格會先第一時間抹黑特區政府，佢就聲稱香港和中國政權對佢不遺餘力地抹黑，但澳洲司法機構卻接納仲裁定佢為品格良好嘅人，高呼「算係向XX政權嘅一記耳光」。佢仲話，普通法制度下，法庭對律師嘅品格有嚴格審查，所以佢就向澳洲當局申報所有喺香港嘅刑事紀錄，最終被裁為律師嘅合適人選 （fit and proper person）。
講到fit and proper，筆者一定要指出，所謂嘅fit and proper，唔係香港特區認為嘅合適，而係國安通緝犯、逃犯遠走香港，去到澳洲再讀書並考到律師。許智峯講得啱嘅係澳洲都係行普通法制度嘅地方，但唔好忘記，香港都係用普通法，如果許智峯係fit and proper，佢根本就唔需要離開香港，而可以喺香港嘅法庭堂堂正正咁為自己洗脫罪名；所以，當澳洲認許佢人格或品格，筆者會覺得係美西方勢力認可佢反中亂港！
事情嘅道理非常簡單，基本上喺香港反政府兼反中央嘅人，美西方勢力會覺得佢哋做嘅嘢係正義（Just）嘅，就如黑暴運動期間，暴徒打砸搶燒，美國政客佩洛西，會形容示威者係一道「美麗風景線」，但如果情況發生喺美國，就毫無懸念地變成暴動，美國警察甚至會毫不猶豫地向示威者開槍。筆者覺得澳洲政府、法庭以至律師會要諗一件事，就係許智峯涉嫌觸犯香港國安法、妨礙司法公正以及欺騙法庭等罪行，係咪去到澳洲發生都可以接受，而且可以畀呢種人成為律師，如果係，咁就唔止係許智峯有問題，而係澳洲政府以至司法界，全部都有問題。
好似許智峯呢種人，鍾意用「精神勝利法」去講到自己好似贏家咁，今次佢聲稱澳洲法律界向世界展示咗澳洲企喺歷史「哪一方」，講到歷史，澳洲啲人係點嚟嘅呢？據悉，澳洲曾經係英國其中一個流放罪犯嘅地方，許智峯話澳洲企喺歷史「哪一方」，係講緊澳洲按歷史接收佢呢個罪犯？講到自己品格如何良好，冇意思；話澳洲係普通法系地方，都冇意思，一班揚言同手足「齊上齊落」嘅人，掉低戰友、兄弟，潛逃海外，就算喺澳洲做律師，本質同事實上，都仲係一個通緝犯，that's all！
收藏
取消收藏
分享
