點新聞 ｜ 每日點新聞 點解香港事

【點新聞報道】無綫周日（12日）晚《獎門人台慶感謝祭》，今集主持陣容有「獎門人」曾志偉強勢回歸，嘉賓陣容分別有陳茵媺（Aimee）的「羅密歐與祝英台」隊及周吉佩的「吉吉之友」隊。

陳茵媺帶領戴着陳豪面具的隊友現身，場面搞笑。另邊廂，「吉吉之友」隊出場時不但隊型唔齊，就連嗌口號都甩曬Beat。在首個遊戲「開心無敵啜乒乓」，首度亮相的Aimee玩得相當落力，在與吉吉對戰啜波時，她以拍枱、叉腰及露狠樣先發制人，可惜得個姿勢最終還是不敵吉吉。至於嘉洛則被安排與麥美恩鬥啜，「餓女」上身的麥美恩發力攻擊，幸好嘉洛反應敏捷，最終一啜入口成功逃離麥美恩魔嘴。

「開心無敵口噏噏」環節同樣搞笑，由於Aimee中文麻麻的關係，製作組悉心安排英文版「Su mi ma sen，I want omakase」給她，雖然Aimee已經手口並用，但負責估的蔣祖曼都是聽到一頭煙。「開心無敵爭櫈仔」環節戰況最激烈，吳業坤為了幫助隊友過關，竟然從人仔細細的鄺潔楹手中監生搶走櫈仔，即時引發全場嘩聲四起，更慘遭圍攻：「你係人唔係呀？當人哋女仔係咩？」、「垃圾！」鬥到最後只剩下Aimee和吉吉上演隊長之戰，全晚表現活潑的Aimee繼續神勇發揮，她「祝英台」上身大曬好身手，不但飛撲搶櫈搞到碌地，更出盡九牛二虎之力將吉吉壓在地上，表現搶眼！

（點新聞特約記者陳惠芳報道）