文/稀思路
大家成日講幸福感，有幾多人真係諗過，到底幸福感係咩一回事？從生理層面睇，幸福感嘅基本條件當然要食得飽、穿得暖；其實講到幸福，仲指向一種心理狀態，一種心境平靜而且免於恐懼嘅狀態，如果有人活於危險同恐懼之下，咁就冇乜可能有幸福或者幸福感。最近，美國槍枝暴力檔案網站公布數據，上年美國有超過4.2萬人死於各類涉槍事件，平均每天死亡約117人，即係喺美國，美國人連基本嘅生命安全都難有保障，呢個國家嘅人，點可能有幸福感？
睇數據，尤其係關於美國槍擊嘅數據，真係「沒有最嚇人，只有更嚇人」，喺2023年即係舊年，美國就發生咗655宗至少4人死傷嘅大規模槍擊案件，係有關網站有數據記錄9年來大規模槍擊事件第二嚴重嘅一年，只係僅次於2021年嘅690宗，42889人死於各類涉槍事件，平均每日大約117人死。呢個數字，都咪話唔誇張。
一個國家，一年入面有42889人死於各類涉槍事件，到底係咩概念？啲人成日話每條生命都好重要，當涉槍死亡人數以萬計，真係唔知係「好重要」，定係「好好好重要」；美國去年涉槍死亡數字，如果以人口極少嘅梵蒂岡計算（2022年中，大約有800人口），美國去年因涉槍而死亡嘅人，係梵蒂岡人口嘅大約54倍，點解美國政府可以無動於衷呢？
其實，筆者之前寫文都講過，美國嘅槍支暴力問題，基本上係由立國開始已經「定下來」，喺200幾年前，1791年通過嘅美國憲法第二修正案，就賦予公民持槍權，而呢項修正案亦催生咗「槍支文化」，好多美國人視持槍為「重要權利」；理論上，有問題嘅法案可以修正，不過涉及到利益，就變成另一回事，喺美國，槍支生產、買賣到使用，係一條好大嘅產業鏈，全國步槍協會（NRA）等利益集團，影響力亦遍及政界，美國政界一啲重量級人物，都有得到槍支集團金援，即係執政、從政嘅人嘅金主就係製槍、賣槍嘅人，美國政客斷金主米路，咪即係斷自己米路囉！
過去一段日子，筆者寫文時經常強調，如果一個國家連自己都搞唔掂，去干預其他國家嘅內政真係十分多餘。放眼依家美國，政治、經濟同民生等問題叢生，槍支暴力係問題，經濟差無家者多係問題，最近連法院都被捲入總統選舉嘅泥沼之中，乜美國班政客都咁有心機去搞中國同香港特區？筆者好想講，針對中國以至香港，係唔會令到美國甚至西方國家嘅自身問題得到解決，因為針對中國，其實仲係破壞緊自己國家嘅政治、經濟利益，而且將精力攞去搞人，用機會成本角度睇，其實亦係失去處理自身問題嘅時間。
今日已經係2024年，喺新一年，美國等西方政客頭腦會唔會清醒啲？一個國家要發展經濟、保持優勢，關鍵唔係針對人，而係要做好自己；套用返美國之前選舉嘅一句經典口號，「It's the economy, stupid!」（「笨蛋，問題是經濟！」）。
收藏
取消收藏
分享
