文/稀思路
講起「港督」，好多人都會諗起「末代港督」彭定康，原因在於，一來佢係最後一任「港督」，二來係佢離任返咗英國之後，都「非常關懷」香港，仲成日唱衰特區政府甚至中央。筆者睇嘢好簡單，彭定康係一個政客，一個滑頭嘅英國政客，特色係用說話去討好個別香港市民，但諗真啲，佢任內有冇為香港做過啲乜？筆者真係諗唔起，所以，佢最近講到香港嘅種種情況，如果筆者只用一個字去回應的話，就係「哦」！
日前，英國牛津市有個賀年市集，彭定康就去做主禮嘉賓同致辭，有傳媒就梳理咗佢講過啲乜，「滑頭政客」一如以往，講咗唔少在場人士聽得好開心嘅說話，包括話喺香港時係「人生最快樂時光」、「（英國）終將會有來自香港背景嘅人入主唐寧街首相府」等等；不過，筆者更留意到嘅，係佢詆毁香港嘅說話。
例如，喺佢講到喺香港嘅「快樂時光」時，就提到香港以往成功故事，「有賴於兼具政治和經濟自由的根基」，彭定康咁講，好似冇乜問題，但如果套用返美西方嘅邏輯，筆者反而會問，英國成日講民主，但係當時嘅港督，唔係由香港市民選出嚟，唔民主喎？用返西方視角，點解彭定康又會認為當時香港政治等制度冇問題呢？唔怕自打咀巴？
不過，令人更氣結嘅係彭定康喺度抹黑基本法23條，佢稱特區政府現在「已經可以因為有人摳鼻子而將其囚禁」，呢種印象式抹黑，真係嚇親人，論香港國安法，或者煽動等罪行，每個被捕、被檢控嘅人，都有其被捕原因；彭定康講到黎智英，話黎喺未審訊下被囚過千日，彭定康可能有所不知，一係黎智英正因為欺詐罪服刑，二係涉及國家安全，保釋條件較緊嘅唔止係香港，而係世界各國都有例子。
至於彭定康講到新聞自由，佢作為世界著名學府嘅校監或者前校監，無可能唔知新聞自由係有界線呀？當年斯諾登踢爆美國喺全球大規模監控，報道事件嘅英國衛報，受到英國政府點對待？筆者記得，除咗有執法人員上門之外，好似連相關嘅記憶硬盤都直接打碎喎；如果香港「冇新聞自由」，英國係咩？由英國殖民式統治香港，到彭定康稱香港冇乜新聞自由，其實佢講嘅嘢，都係雙重標準。
有一點筆者承認，就係彭定康好識得利用一啲人嘅心理，去講一啲嘢去「氹人開心」，但係佢講嘅有幾真呢？在心中啦，好似佢話會有移英港人（或後代）會做英國首相，筆者都唔排除呢個可能，但可能性有幾高，唔知！愈對住口甜舌滑嘅人，其他人就要特別小心，喺相關報道嘅尾段，彭定康仲有類似要「結束某某政權」嘅說話，筆者奉勸呢位前「港督」，小心你的咀，香港事唔關你事，出言中傷仲要涉及政權，即係擺明車馬支持喺香港搞「顏色革命」嘅人，如果真係想香港好，試問又點會講啲咁惡毒嘅說話呢？新年流流，彭定康口出惡毒之言，更是「不該」！
收藏
取消收藏
分享
