阮民安貴賣大光麵掠水　網民鬧爆「食相難睇」

本地即食麵「頂好大光麵」近排成為熱話，「奀星」阮民安亦即刻食住條水，借賣高價嚟搵快錢。其實阮民安搶食人血饅頭都唔係新鮮事，不過今次食水超深，一包即食麵標價30元，賣到鬼死咁貴。不少連登網民都鬧爆「又想呃錢」、「30蚊一包係咪忽Ｘ咗」、「呢條友都幾嘔心，食相難睇到」。

阮民安日前在社交平台發帖話，又有好嘢益「手足」喎。他稱有一間食店老闆入咗一批大光麵，知道大家呢幾日左搵右搵都搵唔到，叫人「老規矩」想入貨，就whatsapp啦。佢又話「小朋友」又有開工，幫手落單，會好好咁將大光面齊齊整整咁送到府上喎。今次仲聯同一間黃集運公司寄埋去海外㖭。

有網民就於連登討論區以「Tommy阮民安老師當手足係水魚？」為題發文，並上載一張截圖，顯示一包大光麵售價30元、四包售價100元、一箱（12包）售價280元。不少人留言嘲諷「Tommy 哥係勁，咁都把握到商機」、「好識昆錢」、「食水深X到」、「「啲錢最尾都係去馬會」、「肯買果啲同入邪教果啲人係無分別」。

不過，仍有「手足」照單全收，留言話「有小朋友送貨，所以貴D」、「賺嚟出糧畀小朋友」、「買得呢包麵係想撐班小朋友」，心甘命抵做「水魚」。