中年好聲音2｜陳俞霏獲XiX助攻減齡　顏米羔偕彭家賢Rock爆舞台

【點新聞報道】歌唱真人騷《中年好聲音2》，周日（3月3日）一集是《九強戰！聲夢學員中二合唱！》，10強選手將與《聲夢》學員拍住上爭奪9強席。

「中年X聲夢」夢幻聯乘，一眾熱愛唱歌、勇敢追夢的好聲音打破年齡界限，擦出不少火花。42歲顏米羔與27歲彭家賢（Zayden）獻唱《紅色跑車》，以紅色外套上陣的二人十足兩兄弟，更特意為是次演出設計小舞步，Rock爆舞台。伍仲衡大讚有穿透力：「呢啲歌顏米羔實食冇黐牙，你好啱唱rock歌，好有火呀，Zayden今日做咗助攻，唔搶之餘好幫到米羔個Vocal。」張佳添笑言：「感覺好正，好似哥哥帶住細佬揸架紅色跑車去溝女！」

獻唱《全身暑假》的陳俞霏+XiX同樣齊齊以Y2K打扮上場，勁歌熱舞大曬青春活力，主持車婉婉笑言：「好似媽媽帶啲小朋友去Playgroup咁！」周國豐笑言：「俞霏真係要多謝呢5位小妹妹，好青春活力，令到我呢啲叔叔睇完好開心，即使有個媽媽陳俞霏喺度，成件事都好有說服力。」陳慧嫻聞言即加把嘴笑謂：「我加入都好有說服力，完全唔覺得俞霏係媽媽，最多咪係大咗2年嘅家姐！」肥媽則搞笑指俞霏造型「不合格」。

獻唱《一眼瞬間》的沈宗賢+趙紫諾（Sabrina）是年齡差距最大的一組，前者41歲、後者15歲，足足相差26年。宗賢是出了名的重炮手，人仔細細的Sabrina則擁有一把雄渾聲線，「最萌年齡差」最終擦出不一樣的火花。雖然Sabrina廣東話進步了不少，但普通話出名水皮的伍仲衡仍堅持對着Sabrina說普通話：「Sabrina唱得很好，但是你很像很怕他，好像被迫的！」陳慧嫻說：「宗賢今次係最有男子氣概嘅一次，但就好似蝦緊Sabrina咁，感覺唔似一首情歌。」