嫌生活苦悶肉赤交税　移英港人欲回流

有好多港人都係人云亦云咁學人移民，去到外地又抱怨呢樣嗰樣唔及香港好，真係好難服侍！ 近日有移英港人在網上發文大呻，話去了英國一年半，覺得真係好悶，又無朋友，日日除咗家務同睇戲都唔知做乜好，家吓悶到連出街嘅動力都無埋㖭。而且他當日離港前賣了樓，將錢投資股票後升咗近5倍，擔心如果要畀增值稅的話，可以要接近8位數，遂有意回流香港。

該名移英港人在圍爐谷發文話，「我來之前賣了樓，因為都唔知自己適唔適應英國，暫時無諗住喺英國置業，所以只係將賣樓後一成嘅錢預備租屋同一家5年生活費，其餘嘅錢買咗一隻股票，而家升咗接近5倍，想問如果我返香港唔再返英國，賣出股票盈利係咪都要交稅？還是要等簽證過期賣出先唔使交稅？因為計過如果而家賣畀要增值稅真係好多錢，可以要接近8位數。」

不過，樓主強調「想返香港原因唔係因為慳稅」，而是因為不適應英國生活。他提到自己「來了英國一年半，落腳牛津，基本上成個牛津郡都行晒，倫敦都去過10幾次，度度都係一樣嘅連鎖店，Tesco 、Sainsbury’s咩Primark Eagamama嗰啲。」然而，「對我來講最難頂係日日買餸煮飯洗衫做家務清潔湊返學放學，真係好攰，我入埋戲院會日日睇戲，啲戲畀我睇晒，有時睇兩次，本身英文唔太好嘅我而家無字幕都我睇得明。」樓主慨嘆，如果住得開心諗住可以喺度過世，都願意肉赤交稅，但而家交唔交稅都諗緊想走。

正所謂「沒比較就沒有傷害」，有網民亦有同感，指「成日話香港處處都係商場，開埋晒啲一鳩樣嘅連鎖店無特色，其實英國咪仲少選擇過香港，香港至少都仲有好多排檔」、「交稅就冇得講，亦係其中一個『預咗』，呢邊乜嘢都係稅」。

有網民分享自身及朋友經歷，「我以前英國讀書就知呢個地方根本悶到抽筋，尤其飲食娛樂，我先不會係呢度等死」、「真人真事，揸成億去英國，已經好豪洗，點之無人陪佢玩，因為真要返咩工，成家都唔識英文，悶到想自殺，返香港後，而家去泰國！」、「真人真事，朋友香港住山頂住淺水灣，英國讀中學大學。早排多咗返嚟香港，同我講遲早搬返大灣區。」

有網民就錯重點，話「我淨係想知邊隻股票」、「呢幾年咩股票升左五倍，好想知」、「跪求開number… 大佬黎左一年半隻股票賺五倍？！！！」、「老老實實升5倍要交8位數，起初個本都唔係細數，咁都無準備好先到，抵比智商稅啦」。