文/稀思路
特區政府就《維護國家安全條例》立法，美西方勢力就用力抹黑立法，之前筆者寫過美國國務卿布林肯，亦寫過所謂人權組織「香港監察」，今日筆者就嚟過「回馬槍」，又同讀者講下「末代港督」彭定康，可能讀者以為佢呢排靜咗，但筆者就喺媒體報道睇到，呢位好喜歡貶低香港嘅英國政客，原來近日喺外國期刊寫咗篇文唱衰《維護國家安全條例》，彭定康嘅抹黑，來來去去都係嗰個語調，但筆者都係要好嚴正地指出，彭定康係老屈，係抹黑！
話說，彭定康喺上月底喺期刊《Project Syndicate》有篇文，又係衝着《維護國家安全條例》而來，最核心嘅訊息，就係聲稱條例會對香港經濟產生影響，「會有更多人離開」、「考慮喺香港開展業務嘅企業亦會愈嚟愈少」。彭定康呢個「理論」，其實就係美西方一直講「香港有23條立法，更穩定但香港會更差」嘅歪理。
講起歪理，彭定康又點止講咁少，例如筆者睇到佢話條例通過，係香港要執行中央嘅「鎮壓措施」，但筆者想講，彭定康唔好咁癲啦，就基本法第23條進行本地立法，係香港特區嘅憲制責任，其實香港回歸祖國後就應該進行本地立法，如果彭定康唔係「一無所知」，就係「明知照屈」，再者講到國家安全法，英國都一樣有，條款可能仲辣。
喺筆者仲係年紀尚小時，已經有親朋戚友講過，彭定康把口好得，今日再睇佢文章，確實名不虛傳，根據媒體講法，彭定康稱「幾周前受邀出席牛津及周邊地區幾家教會的邀請，參加他們組織的全天會議，歡迎香港移民及其家人來到該地區。這些外籍人士中，許多人因專業使其成為英國社會高度重視的成員，很多人也展現了非凡的創業技巧和雄心壯志」，讀者睇到啲咩？我哋睇新聞，見到好多港人移居英國後慘淡嘅故事，而彭定康睇到嘅竟然係一個又一個「非凡的創業技巧和雄心壯志」，其實彭定康係咪串緊班移英港人？
《維護國家安全條例》立法，絕對不如彭定康等外國政客所指，係鎮壓市民或者要影響香港居民同外界聯繫，所以彭定康喺佢文章嘅類似講法，明顯亦係完全錯誤。香港市民同外國企業、組織等交流，絕對無問題，但係，如果有人有目的、有意圖、有行為不當地干預香港，而且涉及境外勢力，咁就係另一回事。譬如，如果有人同彭定康傾偈，唔會觸犯法律，但如果有人配合彭定康有意圖地作出不當手段，咁就係另一回事喇。其實「境外干預」以至其他罪嘅法理，亦係普通法系嗰一套，筆者唔信彭定康唔識，但深信佢係抹黑。
喺彭定康相關文章嘅華文報道，配圖係一張喺台灣地區、穿上有「港獨」標語嘅「港人」示威反對《維護國家安全條例》相片，其實呢張圖片就說明一切，咩人會反對《維護國家安全條例》？就如該張配圖，唔少就係心懷不軌嘅人，有啲人自己反香港特區、反中央政府，甚至有分裂思想，咁佢哋梗係唔想《維護國家安全條例》立法啦；亦如彭定康，由佢當年上任港督開始，都係想同中國對着幹，佢衝出嚟抹黑《維護國家安全條例》，唔會令人驚奇，但會令人覺得，一個老人要靠抹黑香港同中國嚟吸引注意，失敗，而且係「失敗中嘅失敗」！
收藏
取消收藏
分享
