《白日之下》女角原屬意衛詩雅 余香凝不覺執二攤

【點新聞報道】本周日（14日）舉行「香港電影金像獎頒獎禮」，余香凝及廖子妤分別角逐最佳女主角和最佳女配角，二人今日（12日）與泰籍男神Win Metawin一齊出席品牌活動，吸引大批粉絲於場外守候，逼爆現場。

問及余香凝心情是否緊張時，她說：「因為每日都忙，感恩好多工作，兼且囡囡又好精靈活潑，每日都要陪佢玩，用盡晒啲精力，所以都冇時間緊張。」

而廖子妤除自己入圍外，男友盧鎮業同時入圍角逐影帝，她笑說：「本來都還好，但時間愈嚟愈近，都有種緊張感覺，不過今次好多認識嘅朋友都有入圍，女主角我係想余香凝攞啦，無論邊個攞都值得飲返杯，嗰晚應該會好易飲醉，開心。（如果你同余香凝一齊攞獎呢？）嘩，咁真係值得紀念嘅一日，到時應該嘔到癲咗！」

談到有指當初電影《白日之下》女主角原屬意衛詩雅，余香凝回應：「我有睇過相關嘅報道。當初我接到嘅係試鏡嘅邀請，好多演員包括廖子妤都有份參加，可能編劇覺得我的質地比較符合呢個角色，我覺得自己比較幸運。」廖子妤亦說：「我去試鏡嘅時候都磨拳擦掌，好想得到呢個角色，唔緊要啦，下次贏返佢，角色會搵演員，呢啲係緣分。」

至於後晚戰衣，余香凝笑言自己比較保守：「其中一件透透哋，冇嘢露，我只係露齒！」反而廖子妤搞笑說：「我性感，咩都露，因為我好想做性感女星，只係從來都冇人覺得我性感啫，其實性感係一個好高級嘅讚美。（再拍裸露戲？）性感同裸露係兩碼子嘅事，但如果劇本好，我係唔介意（裸露）嘅。（而家有男友喎。）唔驚，佢都係演員，而且我都係人一個，身體又唔係特別精彩！」

（點新聞特約記者陳惠芳報道）