文/稀思路
上回提到，英國首相蘇納克為咗掩飾其施政不濟，所以公開祭出增加國防開支嘅承諾，以國家安全轉移英國問題叢生嘅視線；既然講開英國，不如今日筆者就講下移英黃絲，講佢哋啲咩？講佢哋虛偽，而且係非常虛偽嗰隻，當初佢哋有人移居英國，諉過於香港政治環境，包括香港國安法，不過，當英國去年通過最新嘅《國家安全法案》，唔見佢哋有批評，遑論出嚟示威抗議；英國警權擴大，當然佢哋亦唔會出聲，如果佢哋「正義」嘅標準係一致，點解唔反抗英國政府？因為佢哋嘅「正義」，係因地而異嘅，喺香港係威係勢，去到英國，俗啲講連聲唔敢聲。
最近一單發生喺英國嘅新聞，就更加印證咗筆者嘅判斷，話說，有17名移英港人因為聯署爭取改善工作環境，結果畀管理層炒晒，原來呢班人透過中介去一間工廠打工，有少少似外判、散工，呢種工喺英國好普遍，佢哋指控英國職場生態差，通常都係香港人要做需要快速、工作量多嘅崗位，其他人就多數做唔需要太高效率嘅崗位，於是佢哋響應一位長工嘅行動，聯署爭取改善工作環境，包括「管理層要對員工有禮貌」、「調動崗位嘅次數」唔能夠太多等等，結果，呢班人就沒有「好結果」，全部被「請走」。
呢件事看似好笑，但筆者唔會笑，反而睇到當中嘅一啲問題，例如呢班移英港人嘅心態，明顯係停留喺香港時「做大爺」嘅心態，有唔滿意就嘈埋一份，工作如是，對待社會事務如是，但英國嘅工廠邊有香港咁仁慈，你哋嘈，咪炒你哋囉！不過，嚴格嚟講，佢哋其實只係外判工或臨時工，人哋有權隨時唔用佢哋，根本係連解釋都唔需要，要怪只能怪呢班人「太天真」、「太傻」，連自己嘅位置都搞唔清楚，如果停留喺香港生活時嘅「大爺心態」，英國嘅工廠管理層就示範畀佢哋睇，「你哋邊位，點解要畀面你哋？」
喺黑暴運動時，黃絲喜歡叫自己人做兄弟、手足，有難同當，齊上齊落，但去到英國，香港人畀英國僱主等歧視唔係第一次，亦唔會係最後一次，點解呢班喺香港以為自己惡晒嘅人，去到英國咁唔團結，唔好話出嚟暴動，連遊行抗議下都冇？即係喺香港就乜都投訴，去到英國就乜都忍？呢種做法，其實都係一種虛偽嘅雙重標準，如果佢哋嘅「正義」心態係冇變嘅，應該反英國政府甚至僱主枱呀？
工作同生活上嘅例子，只係部分嘅例子，讀者們可以諗下，呢班移英港人/黃絲反香港國安法，但去到英國，佢哋唔會反對英國制定，更辣、更嚴嘅英國《國家安全法案》；而之前英國新嘅《公共秩序法》生效，賦予英警更多權力對付示威者，佢哋當然都唔會反抗。以前，香港會形容移民外國嘅人做「二等公民」，筆者覺得呢種說法已經好好聽，依家移民英國嘅人，被歧視、被針對，工作環境又惡劣，似係移民做蟻民多啲。
其實，呢間工廠一次過解僱17名港人而毫無顧忌，而日常工作又將最吃力不討好嘅工作留畀香港人做，可以反映一個事實，就係唔少英國僱主，根本就當部分香港人係Nothing（什麼都不是），什麼與港人同行、支援香港人，口號多於實際。筆者有個建議，呢17名移英港人有控訴，可以搵下末代港督彭定康，或者搵下潛逃英國嘅羅冠聰，睇下佢哋點幫大家；呢啲反中KOL，平時最大聲話支持喺海外嘅香港人，大家可以睇下，港人喺英國有事搵佢哋，佢哋實際會做啲咩，定係口惠而實不至。
收藏
取消收藏
分享
