筆是機場｜檢察官對重罪犯　美國總統選舉真重口味

文/稀思路

筆者喺之前文章提及過特朗普「中槍」事件，不過因為事件始終係悲劇，所以筆者都冇特意撰文喇，但美國總統選舉，認真講，劇情隨時仲誇張過美劇，首先係兩個加埋有160歲嘅競爭者（拜登+特朗普），後者不斷攻擊前者健康同年紀，然後後者又受槍擊，之後又到前者中咗新冠；事情最新發展，就係拜登退選，由哈里斯（又名賀錦麗）頂上，勢將代表民主黨迎戰特朗普，打一場「雙方都話會贏」嘅選戰，呢場選舉花生越來越多，美國政客可否預告下，跟住仲有咩驚喜呢？

哈里斯代表民主黨出嚟選總統，有人可能會認為係順勢而行，但講真，呢個似係劇本多啲，一場由民主黨金主、大哥大姐、拜登加核心成員編寫嘅劇本；本來，外界預計過如果拜登唔爭取連任，民主黨其他有意參選嘅人馬上會蠢蠢欲動，令到民主黨四分五裂，結果拜登退選時不忘支持哈里斯，黨內高層包括參議院多數黨領袖舒默、眾議院少數黨領袖傑弗里斯同前眾議院議長佩洛西，都表態支持哈里斯；而且，哈里斯除咗已經攞到足夠嘅黨代表提名票，仲已經至少籌到幾億港元，呢個如果唔係劇本，又係咩呢？美國民主黨同香港特區嘅民主黨，似乎都鍾意玩欽點喎，「民主黨」，邊度民主？

不過，從選舉策略嚟講，筆者覺得民主黨係聰明嘅，如果任由民主黨內部鬥餐飽，咁民主黨未選到代表，特朗普不斷宣傳自己兼攻擊民主黨，咁之後無論係邊個出嚟對陣特朗普，都會非常不利；依家嚟一招「唔好講咁多，今屆係哈里斯喇」，喺民主黨做細嘅，能敵過拜登同佩洛西嗎？不，違抗唔民主嘅民主黨大哥大姐，以後仲點出頭？24小時籌幾億元港紙，你估無組織咩 ...

推哈里斯出嚟，對民主黨而言除咗係一個快刀斬亂麻嘅決定，其實仲有其他好處，筆者至少諗到三個，第一就係，哈里斯本身做過多年檢察官，而特朗普係罪犯，呢度先贏一Round，哈里斯自己都話，「我見過形形色色的掠奪者，例如虐待女性的掠奪者、敲詐消費者的詐騙犯、為一己私利違規的騙徒，我深知特朗普是哪種類型。」擺到明落特朗普面。

第二個好處，在於哈里斯年輕，未夠60歲，比特朗錯年輕近廿年，特朗普或者共和黨人笑拜登老、健康差，依家特朗普反而老哈里斯一大截，係咪到返民主黨笑特朗普年紀老邁呢？至於第三個好處，就在於哈里斯嘅女性同少數族裔身份，因為兩者都未必喜歡特朗普。根據美國嘅民調結果，特朗普係領先嘅，哈里斯亦未完全吸納拜登嘅支持票，但波係圓嘅，選擧勝負亦難料，兩邊都話自己會贏，但唔會兩邊都贏呀？！筆者到今日仲記得，當年有位又係要選美國總統嘅人，擺出一副I am here to win（我是來勝選的）嘅姿態，然後？然後呢個政客就沒有「然後」了。