點新聞 ｜ 每日點新聞 點解香港事

食唔食得㗎？有網民在社交平台上發文，指自己在一間連鎖茶餐廳叫外賣，卻發現豬肉都呈粉紅色，他認為豬肉未熟，遂向餐廳反映，惟店方回覆話「正常」，讓樓主憤而在網上公審。帖文一出，網民反應兩極，有人建議事主去報食環署，亦有人認為「呢啲叫肉鬆粉，實際上係熟不過感官上係唔熟」。

該名民在fb群組「香港茶餐廳及美食關注組」發文，指自己在一間連鎖茶餐廳叫外賣，但是打開後，卻發現豬肉都呈粉紅色，他認為豬肉未熟，遂向餐廳反映問題，惟店方回覆話「正常」。樓主對店方的回應大感不滿，直言「覺得條氣唔多順」。

帖文一出，許多人直斥餐廳離譜，建議事主去報食環署，「生豬肉正常？叫佢當場食咗佢，真係想砌人生豬肉？」、「放入雪櫃，唔好丟，報食環化驗」、「唔係唔熟，直頭係生嘅一樣，紅到透明，叫人點食？」、「豬肉刺身」、「食完一定肚痛叫白車」。

不過，亦有網民解釋熟豬肉都會呈粉紅色，「唔係唔熟因為落得太多化學品先至覺得唔熟，呢啲叫肉鬆粉，實際上係熟不過感官上係唔熟」、「有行內人講過！雪豬有機會係蒸極都粉紅色，不過蒸唔熟例外」、「廚房大哥話雪藏凍肉煮熟一般是粉紅色㗎」、「雪過的豬肉，有啲蒸極都咁樣」、「佢哋話因為雪藏，所以豬扒粉紅色都正常」。