點新聞 ｜ 每日點新聞 點解香港事

【點新聞報道】江若琳（Elanne）接受新城《說故事的人》錄音訪問，與前經理人公司的合約糾紛官司終於完結，回復自由身的Elanne，相隔7年再次以歌手身份推出新歌《一直留在心底的事》，藉以訴說自己的心聲，「你18歲嗰年許願大個想做咩，到大個又做唔做到？呢啲係好多人經歷，包括我自己，我好希望做好我嘅音樂，用番歌手身份唱歌畀大家聽。」

Elanne指以往因身不由己，很多時要被迫放棄唱歌向另一方面發展，雖然有工作已感到快樂，但內心仍是十分熱愛唱歌，「以前有好多遺憾，因為矛盾或者為生活，好多次被迫放棄唱歌，要過五關斬六將先唱到我要唱的歌，依家既然所有嘢（官司）已經完結咗，雨過天晴，我好想為自己活一次。」

Elanne再選出歌，有部分原因是因為1歲的寶貝仔蕭立鈞（Owen），「我個仔好鍾意聽歌跳舞，佢好鍾意我唱歌畀佢聽，我唱兒歌，佢好似我粉絲咁，會由衷咁拍手掌，有一刻我望住佢，覺得佢大個之後，有咩令佢感到驕傲，唔通話阿媽經歷好多低潮同打咗場官司？另外就係有冇做一件令自已驕傲嘅事，我希望個仔大個，話佢聽無論遇到咩事，有夢就要去追。」

那麼她現在想跟18歲的自己說什麼？Elanne表示會感謝昔日自己的熱血和勇敢，「我會好欣賞呢個女仔，當年為工作同理想5日唔瞓覺，喺冰天雪地，零下唔知幾多度跳落污水拍戲，仲要淋雨十幾個鐘，都未死得，諗番都唔知點生存落嚟；依家一啲都唔捱得，唔好叫我捱夜，我頂唔住架！好佩服以前自己，為理想完全忘我，又好儍咁，爭取一份正確嘅事，行一條好艱辛的路，唔知哪來嘅勇氣。」

（點新聞特約記者陳惠芳報道）