【點新聞報道】由梁冠堯（Albert）、梁冠舜（Herbert）首次執導，講述香港動作演員辛酸經歷的電影《武替道》，將於9月26日上映。今日（4日）四大角色海報登場，包括劉俊謙、董瑋、伍允龍（Philip）及蔡思韻（Cecilia）。兩位孖仔導演難忘大前輩洪金寶一席話，他們盼新作傳遞武師辛酸歷程，重現香港動作片專業精神。
《武替道》最引人注目的是香港武術指導界的傳奇人物董瑋。董瑋11歲進入影壇做童星，16歲轉做龍虎武師，曾在李小龍《龍爭虎鬥》中演出及擔任武師之一。董瑋於80年代初參演多部電視劇，演出大獲好評，惟後來他決心專注武術指導的工作，在超過50年的武指生涯中，董瑋曾兩奪金馬獎最佳動作設計，及七奪金像獎最佳動作設計。董瑋從影多年亦不時客串演出，今次《武替道》就是他相隔七年，再度返回幕前之作。導演Albert表示，選擇董瑋來飾演「森哥」這個角色，是因為他具有深厚的背景和豐富的演藝經歷，完美符合這個角色的需求。
而劉俊謙飾演的「龍仔」也是電影中的關鍵角色。導演Herbert提到：「搵龍仔呢個角色某程度上係有啲挑戰，因為喺而家呢個市場，搵呢個歲數嘅人飾演，個身手同武師差唔多，其實係好困難。我哋後尾就選擇咗阿謙去做呢個角色。」
兩位導演均是動作演員出身，早於2006年入行拍攝第一套電影《雙子神偷》，及後二人曾一度離開影壇，輾轉之下決心追夢回歸影圈，Albert指：「阿謙個角色唔單只係我哋兩個人嘅寫照。做呢行好難維持生計，大多數嘅武師會有幾份工作在身。而身邊嘅人又未必明白點解你要咁辛苦做武師。有時候做緊一份正職，突然有人叫你開工，個心好想去但係又行唔開。經常要喺夢想同現實之間做一個選擇。」
兩位導演亦特別提到今次創作深受偶像之一的洪金寶影響，Herbert回憶：「當年有機會同洪金寶拍《雙子神偷》（2006年）係一件好難忘嘅事。我記得有一日特登攞《東方禿鷹》DVD喺片場畀佢簽名。佢攞住隻DVD搖搖頭，感慨咁同我哋講『以前啲嘢拍唔返，最好嘅時間已經過咗』。我覺得呢句說話令我諗起，香港武師咁多年努力，幫香港動作片建立咗一個地位，貿貿然冇咗係一件好可惜嘅事。」這句話深深影響了兩位導演，他們希望透過《武替道》向香港動作電影致敬，並傳遞出武師背後堅持與毅力的精神。
（點新聞特約記者陳惠芳報道）
更多閱讀：
收藏
取消收藏
分享
