點新聞 ｜ 每日點新聞 點解香港事

超強颱風「摩羯」襲港期間，不少家庭仍需要出街買飯，而市面上仍有食肆員工堅守崗位，在橫風橫雨下照常營業。不少外出搵食的網民都在社交平台發文，有的指食肆「8號都唔加價」，甚至推出「打風優惠」。網民都留言大讚「有啖好食」、「唔使捱貴飯」、「有開門真係好重要」。

有網民在fb群組「香港茶餐廳及美食關注組」上傳照片，指觀塘藍田某屋邨商場內有茶餐廳在八號風球下照常營業，並表示「8號都唔加價」。從其上傳的照片可見，收據列出早餐套餐43元，凍飲3元，總計46元。

另有網民在fb「黃大仙區友（黃大仙，新蒲崗，鑽石山，慈雲山......）」上傳照片，指新蒲崗有餐廳在門外貼出手寫餐牌，早餐、套餐一律36元起，留言話「8號風球有嘢食」。有網民更發現黃大仙有酒樓推出「打風優惠」，表示9月6日「全日茶市」、「優惠價格」。

不少網民留言大讚「有啖好食」、「唔使捱貴飯」、「有開門真係好重要」、「好多人仲要返工，食店唔開無得食㗎」，亦有人認為加價也算合埋，「員工肯返工，人工都多啲啲啦，就算加少少都合理啦，老闆賺得幾多啫」、「大家—定要支持8號風球都營業既食肆，為人民服務，就算加價都無所謂啦」。

不過，有網民則認為食肆不加價是正常不過，「打風從來只係交通問題」、「打風撘的士加價就有，幾時開始流行有打風食嘢要加價㗎？唔加先係正常喎」、「唔加價有幾值得講？我見過有餐廳門口寫明八號風或黑雨有折扣添」。