不少移英港人久不久又思鄉，話要搵「家的味道」。近日有英國曼徹斯特有一個以香港為主題的市集，不少港人開檔售賣地道港式美食，惟有網民幫襯其中一個港人檔口後，發文大彈其出品貴、服務差，食物味道更是「垃圾級別」，引來檔主親身反擊「唔好味唔好再幫襯喇」、「都無謂賺嗰幾鎊背脊骨落」，結果引爆網民怒火。
該市集位於英國曼徹斯特一個叫作塞爾的中產區。有移英港人近日在fb群組「曼徹斯特香港谷 英國 曼城 香港人」發文表示，「好少見咁迫，sainsbury基本上一位難求」。他在逛市集期間，分別嘗試了幾款美食，但就可謂大失望：「曼城某知名人士牛雜13鎊-同香港味道相差好遠只可以講普通，開頭話十分鐘最後排隊比錢+等。等咗成個鐘；某出名瀨粉6鎊-味道都係算普普通通好過無囉。如果叫我特登上bury食一定媽媽聲；串燒-十鎊四串燒到勁柴，垃圾級別。自己燒應該比較好；中米雞5鎊-佢比雞珠雞大隻少少啦。味道ok；砵仔糕1.2鎊-佢啱啱開嗰時幾好食，食過好多次一次比一次差。」
樓主直言「唔會再去食」，仲強調「可能我呢個post會得罪好多人，我只係對味道同理念忠誠」。帖文引起網民熱議，紛紛留言「睇賣相都麻麻哋」、「香港人專水香港人」、「嘢食質素咁低昆鬼佬就得」、「香港人精神出到國外真係更加突顯」。
帖文釣出其中一個檔主親身留言反擊，話「法例同council畀我哋生燒熟畀你，你又願意花多三倍以上時間等咪唔柴囉，又或者你咪直接返屋企自己燒，何必又要洗十鎊，又要作賤自己呢？擺市集賣同搞餐廳賣操作分別係點，又未必阿豬阿狗有把口識彈人知嘅。」檔主態度囂張話，「唔好味唔好再幫襯喇，cap埋呢張啦消費者」，對一眾食客的意見當取邊風，「既然我哋滿足唔到閣下嘅要求，都無謂賺嗰幾鎊背脊骨落」。
檔主的回應引起網民怒火，「我絕對唔會幫襯呢間，太口賤」、「講真嘅，唔識做飲食，唔識做生意，冇問題，同樣客人都冇義務要畀錢包容你，但仲要上嚟X客就真係返屋企收皮啦」。
收藏
取消收藏
分享
