筆是機場｜歐盟對華電動車加關稅　害人最終必害己

文/稀思路

國際關係，錯綜複雜，我中有你，你中有我，關係搞得好，大家雙贏；關係搞唔好，大家雙輸，而喺國際貿易問題上，有時候國與國之間傾唔掂數，就會「開拖」，不過筆者講嘅「開拖」，絕大部分時間都唔係真打仗，而係打外交戰、貿易戰，關稅就係其中一種手段。之但係，一個國家或者聯盟對其他產品徵收關稅，其他國家又反制，即係大家都無着數，偏偏外國就好鍾意玩呢招針對中國，最近例子，就係歐盟要對中國嘅電動車加徵關稅，而且仲要係原有基礎上加35%！

當地時間10月4日，歐盟成員國正式進行投票，確定喺現有10%稅嘅基礎上，對中國製造嘅電動車徵收高達35%嘅附加稅，計劃喺10月底生效，歐盟委員會聲明就稱，「投票中歐委會對中國進口純電動汽車徵收關稅的提議，獲得了歐盟成員國的必要支持。」目前嚟講，雙方仲有機會通過談判嚟解決問題，中歐技術團隊亦會繼續進行談判。

歐盟委員會通過投票，但票數分布，其實都值得讀者們睇睇，成員國內有10個國家投贊成票，佔歐盟人口的45.99%，當中以法國極力推動相關措施，佢亦係之前推動歐盟對華電動汽車展開所謂「反傾銷調查」嘅國家，其他投贊成票嘅國家就有丹麥、愛爾蘭、意大利等國家；反對嘅呢，就有德國、匈牙利、馬耳他、斯洛文尼亞和斯洛伐克，但因為反對國家嘅總人口未達到推翻法案嘅門檻，所以呢個加徵關稅嘅法案就通過咗。

點解德國作為歐盟領袖之一，要投票反對？其實唔需要分析讀者都會明白，德國製造嘅汽車，好多都有賣去中國，如果歐盟對華電動車加徵完關稅，然後中國又對德國汽車加徵返關稅，咁德國咪仲傷？所以德國呢次投反對票，合情合理，德國大眾汽車集團首席執行官奧利弗·布魯姆亦表示，如果歐盟舉措導致中方採取相應反制措施，歐洲汽車製造商可能面臨重大劣勢，促請歐盟尋找替代解決方案。

至於法國，出於自身利益，大力推動對華電動車加徵關稅，不過，筆者搵到啲數據，法國唔會好似德國咁，賣咁多車去中國，但法國嘅農產品呢？2023年，中國自法國進口農產品，近470億人民幣；而喺消費品方面，中國自法國進口嘅消費品，包括化妝品、箱包、首飾、服裝同鐘錶等，幾年來年均增長12.3%。如果法國帶頭玩關稅戰，而中國被迫反制，包括對乳品、紅酒、消費品等加徵關稅，法國係咪最終搞到自己呢？

全球化以至自由貿易之所以成事，係因為大家都賣自己用更低成本/更有效生產到嘅嘢畀對方，形成比較優勢，互惠互利，如果鬥加徵關稅，鬥打貿易戰，除咗會兩敗俱傷，仲會破壞到環球貿易體系，法國帶頭針對中國，好可能最後對自己都冇好處。而且，中國對法國進出口貿易，一直都喺度上升緊，依家歐洲經濟咁弱，更需要中國呢個可靠嘅貿易夥伴，希望歐盟懸崖勒馬，唔好破壞雙方利益。