（有片）唔講得｜談夫妻相處之道　葉童：隻眼開隻眼閉

【點新聞報道】影后葉童將會同黃德斌，於今年11月首次合作演出舞台劇《唔講得》。二人接受電視台訪問時，葉童表示知道對手是黃德斌，都有少少開心：「因為我哋其實唔係好識對方，所以都擔心究竟係咩人嚟㗎呢？然後發現呢位男士真係有啲麻煩喎！又Cool喎！不過相處落嚟就發現，只要同佢傾多啲，佢就會滔滔不絕！可能係怕醜內斂啲啦！頭頭真係唔知佢想點！哈哈哈！」

說回這套舞台劇，葉童表示有談及很多人性內心的世界：「好多嘢究竟講定唔講呢？如果講咗出嚟，接唔接受到個後果呢？」說到人與人之間的相處，是否要完全坦誠，葉童就表示說話可以包裝：「我覺得每樣嘢都可以包裝，想話對方嘅嘢，講得正面啲，唔好咁負面，呢啲都係說話嘅技巧，同講大話冇關，可能內心好想講，但你可以將佢包裝成為唔係大話！」德斌聽畢葉童分析如何「不講大話」，立即表示：「女人有時分析嘢真係好恐怖！我就覺得大話最好就唔好講囉！係唔夠膽講，驚俾人拆穿，又驚自己唔記得講咗大話！到穿煲嘅時候，兩個人就會失去信任，彼此關係就會失敗！」

說到夫妻之間的相處之道，是否所有事情都要坦白，與丈夫相愛超過30年的葉童，就有一套見解：「我覺得係要隻眼開隻眼閉！哈哈哈！你睇下黃德斌，幾認同呀！同老公雖然相處咗咁多年，但仍然會有唔同嘅見解，所以唔好有太多堅持，要強迫對方認同，可能佢朝頭早見到我樣嘅時候，都係隻眼開隻眼閉呢！哈哈哈！」德斌亦非常認同葉童的說法：「人都係獨立嘅個體，你冇可能強迫對方一定要認同你，所以無論幾多年都好，都要保持大家可以有自己嘅獨立見解同埋思維，我覺得呢個就係最好嘅相處方式！」