筆是機場｜羅冠聰回應性侵指控　講完等於「冇講」？

文/稀思路

大約一個月前，筆者寫咗篇題目為《現代淫賊羅冠聰》嘅文章，件事係關於羅冠聰幾年前被指性侵議員助理X，事後要求對方保密，當佢被踢爆時，仲玩封殺，唔畀人再參與黨內任何工作，之後有女權人士想介入，仲因為羅冠聰喺攬炒派嘅地位而不了了之。當時，其實已經係事件再炒熱之後嘅大約一個月，奇就奇在，一向「有事必反」嘅羅冠聰竟然冇出聲，再事隔一段日子，即係大約一星期前，羅冠聰終於「不正面地」回應，但睇落去回應咗等於冇講過咁，即係有性侵，定係冇？還是冇性侵，有欺騙感情？定還是其他問題？

坦白講，筆者自問，唔算係一個愚嘅人，至少好少睇完一段文字，都唔肯定自己有冇理解到當中內容，但羅冠聰呢段「似非而是」嘅文字，筆者都唔肯定，即係佢認有呢件事，定係否認呢件事，筆者先將佢部分內容直接引出嚟，等讀者們思考下：

「過去一段時間無論喺網絡或者官媒，都有唔同針對我嘅指控攻擊，的確令人勞累疲倦。我並非一位完美嘅人，喺過去嘅關係會有處理得唔好嘅地方，但違反任何人意願，甚至以暴力作親密行為，我係從來都無做過，亦永遠都唔會咁做。」

「網絡流傳嘅指控，當中有好多內容細節係不可能合乎現實以及前後矛盾，同時我亦有同被提及嘅「涉事人」喺果段時間友善正面嘅溝通互動，以及其他相關紀錄。對於呢啲狀況，考慮是否、如何回應都涉及好多因素，有啲事情如非必要，我都唔會公開澄清發佈，希望大家都能夠理解。」

睇到以上兩段文字，即係佢有性侵或性騷擾過前助理，定係冇呢？根據佢講法，佢話自己「違反任何人意願，甚至以暴力作親密行為，我係從來都無做過」，即係無不當侵犯過人，但係前面嗰兩句，係話「我並非一位完美嘅人，喺過去嘅關係會有處理得唔好嘅地方」，筆者窮盡一切可能，係咪可以理解為佢話自己冇性侵過其他人包括前議員助理X，但係有啲關係，處理得唔好，對唔住人？如果係咁，到底係咩事先？

跟住下一段，佢話同「涉事人」應該係指議員助理X，喺果段時間有友善正面嘅溝通互動，講真，「語言偽術」聽唔少，有合作就有合作，有交流就有交流，有溝通就有溝通，平時羅冠聰講嘢非常直接，講到被指性侵，一時就話「我並非一位完美嘅人，喺過去嘅關係會有處理得唔好嘅地方」，一時就話曾經同對方「喺果段時間友善正面嘅溝通互動」，講到咁隱約，似係否認性侵，但應該同對方「有啲嘢」喎！

以羅冠聰性格，以攬炒派政客嘅性格，如果被人屈、被誣蔑，正路嚟講，應該係話「我冇性侵，我被屈」，用啲咁委曲嘅說話去解釋，似乎唔似羅冠聰性格。嗱，筆者咁講，唔係話羅冠聰一定有性侵人，但什麼過去關係處理得唔好，什麼曾經同對方有過友善正面嘅溝通，羅冠聰可以講清楚啲；一個公眾人物，咁鍾意批評其他人，醜聞一發生喺自己身上，就即刻咁多「語言偽術」，各位讀者信唔信羅冠聰？筆者相信嘅，喺擺出嚟嘅事實，講嘢講到咁婉轉，羅冠聰今次真係非常「唔似羅冠聰」。