文/稀思路
幾日前，泰晤士高等教育世界大學排名公布，世界第一位，係位於英國嘅牛津大學，呢間世界最古老之一嘅大學，多年嚟都係莘莘學子奮鬥嘅目標，如果入到牛津讀書，唔好講讀咩科目，剩係講個名都夠威；不過，一間大學可以喺世界頂峰，亦可以因為一件事而蒙上污點。最近，據講牛津大學收咗一個「港獨」逃犯做學生，而且呢位學生仲係攞獎學金入讀，筆者實在十分好奇，世界一等一大學，為何淪落至此？
牛津大學收嘅「港獨」逃犯，就係劉康，劉康冇黃之鋒、羅冠聰佢哋咁「出名」，可能會少啲人記得，不如先等筆者同讀者們Recap一下劉康嘅背景，喺香港土生土長嘅劉康，喺葵涌讀中學，畢業後入讀香港公開大學，非法「佔中」時就開始關心時政，之後成為煽動分裂嘅「港獨」派，2019年仲成立所謂嘅「香港效益主義黨」，香港國安法生效前逃到英國，之後被香港執法部門通緝。
睇劉康喺Facebook發帖，只能用極度囂張去形容，標題第一句就話自己「港獨逃犯劉康獲獎學金入讀牛津大學」，內文就提到自己「流亡多年」，「不遺餘力牽結外國勢力，本年學費£9,250將由英國政府官方慷慨資助」、「冀望自己牛津畢業後，盡萃學力，繼續努力不懈出版政治禁書及哲學論文」等等，筆者想問讀者，你哋聯想到啲咩？
如果睇劉康擺喺Facebook嘅相，係一張展示「港獨」標語嘅相片，成件事表面係劉康耀武揚威，實際意思，係話英國政府以至牛津大學，都好似支持（咁講嘢、影相都得？）劉康入牛津，再借牛津個朵搞事！一間可能有近千年歷史嘅世界級名校，淪落到畀一個「港獨」逃犯宣揚非法理念、借個名號嚟煽動「港獨」，筆者認為已經唔可以用「牛津搞cheap自己」去形容，而係牛津被利用兼有啲「折墮」。
到底劉康係因為文章出眾被牛津收為學生，有「名人」推薦佢所以入讀，定係因為政治立場而成功，劉康有自己一套講法，筆者證實唔到；筆者記得自己當年去牛津大學，有人向筆者介紹，劉康影相果個背景建築，如果筆者冇認錯，就係拉德克里夫圖書館 (Radcliffe Camera)，係牛津大學嘅象徵建築，一個被通緝嘅逃犯，喺牛津大學嘅拉德克里夫圖書館門口宣揚「港獨」，然後牛津仲收咗呢個逃犯做學生，畀佢借自己名號去分裂中國，筆者唔知牛津大學對劉康有冇足夠了解，但未來幾年甚至更長時間，劉康肯定會食住牛津個朵去搞事同挑釁，容許筆者用一句港式英語問牛津大學接收逃犯嘅決定，「Are you serious？」
收藏
取消收藏
分享
