文/稀思路
喺西方嘅民主選舉，多多少少都係宣傳緊一種「民主萬能論」，呢個總統唔好？換走佢囉！覺得拜登無作為，都係換走佢！但有個核心問題，係咪換個人，個國家就會變好？無論係美國、英國以至其他地方嘅例子，都似乎話畀我哋聽唔係。11月5日係美國總統大選日，正當讀者們諗緊邊個會勝出，美國選民會點揀時，其實部分美國選民，係兩個都唔想揀，一個鍾意煽動仇恨，另一個就能力不足，點揀落手？
今次美國總統大選，選情都好激烈下，係特朗普贏定哈里斯贏都好難講，不過，有傳媒就報道，其實部分選民係「兩個都唔想揀」，有選民直言民主黨喺阻止非法移民方面唔掂，而哈里斯喺加州做總檢察長時，就通過咗好大爭議嘅提案《安全社區和學校法》，將盜竊950美元以下商品等罪行從重罪降為輕罪，變相縱容罪犯再度犯案，導致治安狀況惡化。特朗普又如何？就算美國選民唔講，讀者們都會明白，佢係幾鍾意挑起事端，煽動仇恨。
每逢選舉，理應係選民尋求改變、擁抱希望嘅時候，但今次美國大選嘅氣氛就認真神奇，有民調就顯示，超過七成半美國選民驚有人喺大選後企圖暴力推翻選舉結果，例如特朗普陣營會提早宣布「勝選」（上屆特朗普唔承認選舉結果，觸發之後嘅國會山莊暴動），喺美國唔少地方，都裝晒絲網、擋板、加固門窗等，嚴防騷亂。
如果以唔同層面睇美國大選，尤其係選民角度出發，都會睇到唔少諷刺嘅地方，首先當然係「民主萬能論」係假嘅，因為美國選民，已經唔相信政黨輪替、再選一個新嘅總統會令美國更好，今次大選共和、民主兩黨派出嘅候選人，要選民喺「朱古力味嘅屎同屎味朱古力」之間作出選擇，都咪話唔悲哀。另一方面，選舉之後可能出現暴力現象，更令人對美式民主「望而生畏」，如果暴力事件係大選嘅必然後果，咁呢種民主，定必係劣質民主。
再講深啲，無論係特朗普定係哈里斯當選，美國依家嘅亂象，可能係邊個上台都冇救，只能繼續下沉，例如美國內部繼續撕裂，基本上已經係改變唔到嘅局面，其自身問題包括槍枝暴力、罪案嚴重、貧富懸殊以至部分族群被歧視等，都係無解。曾經，由美國政治家有份建構嘅理論、制度令美國盛極一時，但當制度走到極致，民主多元化，就變成民粹、撕裂。
喺呢場美國大選，筆者較為關心嘅課題，就係中美關係之後嘅走向，可惜，就如美國內部嘅亂局一樣，美國大選係特朗普定係哈里斯當選，都應該會繼續針對中國嘅路線，因為即使被視為較溫和嘅民主黨，拜登政府早前亦通過咗限制美國個人同企業投資中國先進科技嘅禁令；美國咁做，係損人不利己，甚至係損人又害己，如果理性係一種力量，而將來嘅美國政府能夠睇通時局，應該覺今是而昨非，從內到外，糾正唔應該有嘅決策同外交方針。當美國無可避免要往下沉時，能否有一線生機，要睇將來嘅美國總統，係繼續民粹先行，定係理性施政、打好對外關係。
收藏
取消收藏
分享
