文/稀思路
特朗普成功再當選為美國總統，外界最關心兩個情況，就係對內會點解決經濟問題，對外又會如何「撕裂」世界，呢啲問題，讀者們都會睇到，而筆者關注嘅，仲包括特朗普嘅「個人」問題，就係佢孭住嘅刑事罪行同幾單官司點處理；依家，特朗普涉及四單刑事案件，包括兩單聯邦案件，根據傳媒報道，佢幾宗案件隨時「一筆勾銷」。我哋成日話「天子犯法，與庶民同罪」，但原來喺美國，「總統犯法，會變成無罪」，美式法治真係衝擊世人三觀。
美國聯邦法官8日宣布，因應司法部要求，暫停特朗普涉嫌干預2020年大選訴訟程序，長期以來，唔起訴現任總統係司法部嘅政策，有法律專家指出，特朗普勝出總統大選後，實際上佢面對嘅四宗刑事案件已經消失；呢位美國歷史上首個「戴罪」當上總統嘅人，擊敗咗民主黨，仲擊敗埋美國嘅司法體制，美國嘅三權分立、民主法治，原來，只係笑話一則。
現時，特朗普共涉及四宗刑事案件，包括干預2020美國大選案、「密件門」案，仲有「封口費」同干預佐治亞州2020年大選案，其中，「封口費」案件已經被定罪，特朗普34項罪名成立，本來今個月26日會判刑，但睇依家情況，特朗普將會獲得豁免，唔會被判入獄，名符其實，逍遙法外。
另一單更為矚目嘅案件，相信就係干預2020年大選案，如果讀者們有印象，當年特朗普輸咗畀拜登，但就唔承認敗選，聲稱「選舉舞弊」，佢嘅支持者仲衝擊國會，造成罕有地發生喺美國國會山莊嘅暴動，睇依家情況，相關案件都會喺特朗普身上「一筆勾銷」；問題就係，佢之前可能承諾過會「特赦」暴徒，有正在審訊嘅被告話自己「同其他政治犯要回家了」，如果係真嘅，特朗普自己涉嫌犯罪變冇事，示威者/暴徒又可能冇事，美國仲有冇法治可言呢？
如果睇下相關新聞，會發現與特朗普相關嘅司法新聞，「沒有最醜陋，只有更醜陋」，因為特朗普一早講過，佢上任後會用「兩秒鐘」去解僱佢認為針對佢嘅特別檢察官史密斯，而其他共和黨人亦要求保留相關材料，準備隨時報復史密斯；之前特朗普喺電台節目上，甚至講過應該將史密斯「趕出美國」。當犯罪嘅話自己冇罪，執法嘅又會畀人針對，筆者想問，美國自己一團糟，點解仲要喺世界其他地方興風作浪？
其實，特朗普再勝選、一連串司法案件以至美國內部「混亂的法治」，都指向一個事實，就係美國行政、立法以至司法，三權都陷入混亂狀態，當一個「戴罪的人」可以重新登上美國總統寶座，可以反映美國「冇人才」，亦反映社會出現病態，情願選個有罪嘅人，都唔選其他人。相比之下，其他實行普通法制嘅地方包括香港，明顯正常好多，法庭依法審判，唔會出現「有罪變冇罪」；如果司法出現問題要受到「制裁」，應該係全世界去制裁美國先啱，希望特朗普上任後「重新做人」，多做事，多合作，少搞事。
收藏
取消收藏
分享
