文/稀思路
之前筆者已經寫過唔止一次，外國勢力干預香港事務，係佢哋嘅「日常工作」。香港國安法通過，佢哋干預一番；《維護國家安全條例》通過，佢哋又嚟干預。最近，美國國會轄下嘅「國會及行政當局中國委員會（CECC）」發表所謂2024年年度報告，當然會繼續抹黑香港，以及重點針對香港嘅維護國家安全法律，而且今次仲「升級」，要求制裁應特區政府要求而行事嘅金融機構。其實，維護國家同特區安全係應有之義，依法執法亦係為咗社會安寧，如果「美國是對的」，咁其他國家咪要制裁美國好多次？
以美國為首嘅西方國家，近年都有針對香港事務嘅「三部曲」，就係抹黑、針對同制裁。今次嘅CECC嘅目標，就轉向金融機構上，建議美國國會指示財政部，要制裁根據特區政府要求行事嘅金融機構。有學者就認為，美國如果真係咁做﹐即係要展現「美元霸權」，係傷人損己，打擊到雙方經濟；特區政府亦發聲明，CECC重施故伎，通過所謂「年度報告」干涉香港特區事務，肆無忌憚地詆毀「一國兩制」成功實踐下嘅香港。
要回應或者評論美國嘅霸凌行徑，其實可以分為幾個層面，如果從香港唔同國安法律嘅起源去睇，第一肯定係香港國安法立法、《維護國家安全條例》本地立法，都係因為2019年嘅黑暴，社會有急切必要止暴制亂，所以中央先為香港制定香港國安法；美國政客認為黑暴係「美麗風景線」嘅立場，佢哋反對香港國安法，似係佢哋用行動支持黑暴，「支持」香港被暴力破壞。
再一路講落去，如果香港有國安法或國安條例係「問題」，咁西方國家嗰啲又係咩呢？美國，唔少報道都講過至少有20條國安法，叛國罪最高刑罰可能係死刑；英國嘅國安法，亦可以追溯到百年前甚至更長。其他「五眼聯盟」國家，都有唔同嘅法律維護國家安全，如果香港特區有國安法、《維護國家安全條例》係「侵犯人權」，咁西方國家都「侵犯」咗市民好耐喎！
外國政府、議會以至政客若然認真了解香港國安法嘅執行過程，會睇到相關被告由被拉、檢控、審訊到判決，每一個審訊以至裁決環節，都嚴格依照法律原則進行，讀者們都可以留意下黎智英案最近嘅審訊進展，基本上黎智英自辯時，仲係不斷唱衰特區政府甚至中央，而法庭亦給予佢足夠機會申辯；如果相關法律「有問題」，可能唔需要長時間審訊，一眾被告早就被定罪，好似英國暴動案啲被告咁，「純熟迅速」地送入監獄。
今次美國CECC將目標指向金融機構，其實亦係美國「另一霸權」嘅力證，軍事上美國依靠美軍，可以隨時介入其他國家嘅政局甚至戰爭；喺金融財經領域，基本上美國如果要針對某一個金融機構，限制對方用美元交易等，金融機構馬上陷入困局。筆者素來鍾意睇下歷史書，當年美國為咗「搞掂」日本，就係用迫日圓升值呢招，重點係，美國嘅金融霸權係連盟友都會搞。如果美國真係要用金融手段對付唔同嘅金融機構，除咗會損害埋自身利益，亦都係話畀全世界聽，美國係假正義、真霸道！
相關閱讀：
收藏
取消收藏
分享
