文/稀思路
記得家中有個前輩講過，喺三、四十年前去過美國公幹，當時見到美國喺城市建設、公路網、鐵路網等，都做得非常完善，令佢感覺好意外；但佢同時指出，幾十年過去，其實美國嘅城市建設，冇乜大進步，相反中國喺城市建設等方面已經有好大進步，「十年河東，十年河西」。最近，加州山火近乎係世界最熱門新聞，筆者睇新聞報道同網上片段，完全有一種「世界末日」嘅感覺，一個世界最富有地區之一，政府、消防隊只能眼白白睇住火勢不斷擴大，居民只能任由家園被燒毁，呢場大火，係天災，定係人禍？
整場大火嘅節點，唔係消防員唔想救火，而係消防栓「冇水」，據悉，重災區太平洋帕利塞德等消防栓冇水，嚴重阻礙消防隊滅火行動。睇美國媒報道，有消防員喺救火時，將水管插入消防栓但發現冇水，當地嘅工程師解釋，用水需求連續超過正常水平，導致水壓下降，指市政供水系統並非為大規模火災設計。筆者仲聽過個講法，話本來有地方嘅水可以救火，但因為環保人士要保護池內嘅「魚」所以反對抽水救火，如果呢個講法屬實，認真可笑。
加州大火，我哋作為局外人可能覺得好意外，但喺當地嚟講，其實一啲都唔意外，因為加州成日有山火，唔少保險公司都拒絕承保，保險公司對加州房屋保險避之則吉，加上極端天氣頻發，保險公司就更加唔願意承保。例如，保險公司State Farm從2023年5月起，不再接受加州房屋新保單，去年3月更不再為7.2萬份加州保單續保。當保險公司都知道風險，而當地政府就好似後知後覺咁，佢哋到底做緊咩？
美國加州政府，以至洛杉磯消防局（LAFD），唔係冇做嘢，但人哋唔可以用正常思路去睇預防火災，人哋係搞政治的！現任洛杉磯消防局局長克勞利係一位女性，亦係第一個公開嘅LGBTQ+人士，佢嘅另一半係退休女消防員；佢嘅前任消防局長，因為制止消防局內部嘅性別歧視同種族歧視不力而辭職，當時洛杉磯市長提名佢，係因為睇中佢應對「公共安全挑戰嘅能力」，而克勞利任內，就好努力推行確保公平、多樣性嘅改革，有美國網民就指，呢位局長「更關注LGBTQ+活動，而不是補充水庫」。
如果各位讀者都係物業持有者，相信買樓時會好注意一樣嘢，就係火險，有啲屋苑火險要自己買，有啲甚至係屋苑會包埋，美國加州係世上最富有地區之一，一個極發達地區，居民連想買火險都難，或者要好貴價先買到，明眼人都知，係風險高到保險公司「有錢都唔想賺」，但加州州長等做緊咩呢？當地火災嘅風險，當地人以至保險公司都知，但政府唔理，消防局掛住搞「平權」，實在相當諷刺。
大火起火原因仍待調查，當地有居民話見有人向樹林淋汽油，但因為忙於救火，警方都未嚟得切調查清楚。呢場大火，起火原因有待調查，可能係天災，可能真係有人縱火，但從處理火災嘅手法睇嚟，呢場大火至少有「一大半」係人禍，一個富有地區可以搞到「世界末日」咁，美帝嘅地方政府，忙緊乜？如果搞政治、搞平權重要過搞建設或者防災設備，係好符合美帝風格，只不過，好冇人性！
收藏
取消收藏
分享
