點新聞 ｜ 每日點新聞 點解香港事

【點新聞報道】本港飲食業紛紛施展奇招，廣推優惠，逆市「自救」。近日有網民分享荃灣公園的小食亭的超抵優惠，4款常餐一律$25，不旦送熱飲，加$3即可另購雪糕杯。有網民大讚是「窮人恩物」、「抵到爛」、「平靚正！」，不過有網民則指「人流小，出品靚，好難捱」。

該網民在fb群組「香港茶餐廳及美食關注組」發文分享荃灣公園的小食亭推出午餐優惠，表示「$25蚊，午餐有熱飲。荃灣公園」。從其上載的照片可見，該小食亭設計成帆船，店方在「船頭」竪立午餐優惠告示，4款常餐一律$25，包括：瑞士雞翼煎蛋撈麵、墨魚餅火腿湯烏冬、漢堡扒腸仔湯一丁及咖喱魚蛋餐肉湯米，所有常餐更送熱飲，加$3還可另購雪糕杯，供應時間為上午11時至下午6時。

帖文引起網民熱議，有經常光顧的網民大讚食物質素，「佢早餐個三文治同奶茶先係正嘢，出面食唔到咁高質」、「幾乎日日都去買早餐」、「呢度d 魚蛋燒賣都抵食，同個女係公園玩完一定會去食，不過佢1730 就收舖，有時玩夜咗都無得食」。

有網民直指是「窮人恩物」、「抵到爛」、「平靚正！」、「好抵呀，平時返工食一個都70蚊」、「時光倒流三十年價錢」、「食一粒燒賣嘅價錢就食到個午餐」、「一流，好似在自己隻遊艇嘆世界咁」。

另有網民感慨小食亭生意難做，「呢個位好難做...露天，日曬雨淋，冬凍夏熱，附近冇商廈學校，人流少」、「人流小，出品靚，好難捱」、「我每次經過都覺得店主真係艱苦經營！」。