文/稀思路
從政嘅人，一直都有級數之分，最高境界嘅叫政治家，但能夠成為政治家嘅人少之又少；次一級，當係普通從政嘅，筆者就會用一個中性啲嘅字眼去形容，叫從政者；再低一級嘅，叫政客，即係佢哋從政只為利益，不問蒼生，所以成日會俾人批評剩係識抽政治水。不過，抽政治水都有分抽得靚唔靚，如果好似英國外交發展大臣林德偉（David Lammy）見香港通緝犯，仲要被通緝犯劣評，就明顯係抽得樣衰喇！
話說，特區政府之前通緝幾名海外港人，其中四人就身在英國，林德偉就聯同政務次官衛倩婷（Catherine West）上周三（15日）同佢哋會面，衛倩婷仲非常慷慨激昂地聲稱，「英國港人社群的安全是英國政府的首要任務」；而林德偉就喺會面中途現身大約15分鐘，一坐低就有攝影師出現，做政治騷味道甚濃。
嚴肅嘢唔講住，事後通緝犯之一鍾劍華就向媒體表示，認為林德偉只係到場影相、態度敷衍；雖然另一通緝犯劉珈汶就認為會面「認真」，但亦指出英國政府似乎未有意慾，採取強硬措施應對事件，仲呼籲英國「制裁」香港官員、檢控官同指定法官。
由於以上視角比較少人提及，容許筆者直白啲講，林德偉或者係衛倩婷，就係當幾個香港通緝犯係臨時演員！例如林德偉，一個大約一小時嘅會面，只係出現咗15分鐘，影下相，態度又hea，似唔似有心要「保護」一班來自香港嘅通緝犯呢？至於衛倩婷，連話「會面認真」嘅劉珈汶都覺得英國政府冇咩意慾同實際行動，其實成場會面，就係英國官員嘅一場政治騷，做畀在英嘅香港人睇。
不過，做騷還做騷，要譴責嘅都係要讉責，有媒體話，呢次係第一次（雖然未必係）有英國高官公開、高調地會見香港嘅通緝犯，講真，喺香港涉嫌違法嘅人，去到英國，唔係應該得到英國「保護」，而係佢哋應該回港接受調查或審訊；衛倩婷聲稱要保障英國港人社群安全，呢句話有啲虛，筆者要問清楚，港人社群係咪包括呢幾位通緝犯？如果係，即係英國要包庇其他地方嘅嫌疑犯？到底係英國保護佢哋安全，定係英國有份破壞香港特區以至中國嘅國家安全？
由之前英國暴動時警方執法力度、法庭判案速度可見，英國對待反政府嘅暴力活動等，手段絕對比特區政府「快、狠、準」。當一個國家雷厲風行地打擊反政府活動時，竟然喺另一邊廂又包庇危害香港特區安全嘅疑犯，呢啲係咩？即係英國嘅安全係安全，香港就最好唔安全？從政嘅，次一級嘅政務官好，更高位嘅外相都好，有時做騷還做騷，應該有條底線，要分對錯，如果對錯不分，盲目反中，可能最後會燒到自己㗎！
收藏
取消收藏
分享
