【點新聞報道】過年當然少不了睇賀歲片，今年有《臨時決鬥》古天樂攜手《九龍城寨之圍城》班底再度上演精彩對決。日前古天樂就聯同王丹妮(Louise)及張文傑(German)，一齊接受HOYTV主播俞詠文Angela的訪問，大談當中的拍攝趣事。
古天樂於戲中有多場和王丹妮對打的戲份，古老闆笑言他有憐香惜玉：「我一直以為佢高過我，原來唔係囉！因為對打嘅時候全部都赤腳，所以見真章，我梗係有錫住佢啦！不過佢唔覺咋嘛！」Louise及German亦認同古老闆有所遷就，German表示和老闆對打不難，最難是對戲：「因為嗰場我哋對罵時候真係好近，幾乎可以親吻對方！爭啲忍唔住錫咗落去，所以好緊張！哈哈哈！」
說到最難忘的劇情，古老闆就自爆為王丹妮度一句對白而廢寢忘餐：「我記得我為咗幫佢度一句好精警嘅對白，諗咗成晚都諗唔到，之後無端端睇咗一個人物訪問，佢講嗰句「Never get stuck」(不要鑽牛角尖)，我覺得幾好喎！因為中文好難用一兩句去講到呢個意思。人唔應該stuck得咗喺度，一定要向前行啦！Move on啦！」
German亦坦然，自己都曾經鑽牛角尖：「頭頭轉去幕前嘅時候，嗰幾年真係好艱難，完全冇人識自己，但最後都係自己走出困局。」Louise明言經常處於鑽牛角尖嘅狀況，但無論怎樣都好，日子總得要過，回頭再望，其實沒有什麼大不了。古天樂亦認同每個人都會面對過困境，會鑽牛角尖：「只能夠講句，如果自己冇辦法走出來，就要隨遇而安，唔好逼得自己太緊，幫到自己嘅只有自己一個，放鬆下先囉！」
近年為香港電影業付出很多的古天樂亦承認，未來電影業還要面對很多難關：「經濟又唔好，咁我覺得未來電影業一定要一個好大嘅轉變，第一樣嘢就要知道市場嘅定位，第二就係要了解觀眾需要啲乜嘢，呢兩三年對於業界同埋觀眾都係一個整合期，大家都要磨合一下，我只能講大家做一啲創新啲嘅嘢啦！向新嘅方向出發，唔好再Stuck喺度。」
（點新聞特約記者陳惠芳報道）
更多閱讀：
收藏
取消收藏
分享
