文/稀思路
如果讀者有睇開稀思路嘅文章，其實筆者不時都會透露一個想法，就係今日英國畀移英港人用BNO「5+1」申請入籍，唔代表「之後都可以」；呢種想法或估計雖然未成真，但就反映出BNO「5+1」嘅不確定性。最近英國在野保守黨提倡增加移民入籍年期要求，建議由「5+1」改為「10+5」，雖然之後澄清倡議唔包括BNO簽證，但爭啲嚇死咗好多人。其實，反移民、反難民係英國嘅一種趨勢，今日BNO簽證冇事，根本冇人可以保證將來都冇事。
英國保守黨黨魁柏丹娜（Kemi Badenoch）本月5日提出修改移民政策，建議入籍年期由「5+1」延長為「10+5」，佢仲表示等待入籍期間，唔可以領取福利，如有犯罪紀錄或已申請公共房屋等，都唔會獲得居留權。之後有英籍港人保守黨員展示黨內組織回信，就澄清柏丹娜嘅倡議係唔涉及BNO簽證嘅，唔少移英港人都鬆一口氣。
對於英國保守黨嘅倡議，筆者覺得前特首梁振英嘅分析值得參考，因為佢本身喺英國留學過，肯定畀一般港人更了解英國狀況。梁振英指出，自己過去曾公開講過英國政府對香港人嘅BNO政策「隨時會改，隨時可以改」，並以1977年出台《英國國籍法綠皮書》為例，指當時啟動立法程序，取消香港超過200萬英籍人士居留英國權利。梁振英更形容，英國政府近年BNO政策係「完全是政策上的權宜決定」，第時無須修改法例，就可以改變BNO港人嘅居留權，呼籲持BNO打算移英港人「回頭是岸，是時候了」。
因為呢件事，筆者都上網睇過一啲評論，有黃媒或黃營KOL，就嘲諷有人炒作新聞，指出保守黨唔係執政黨，甚至話柏丹娜民望偏低，意指佢講嘢冇代表性，或者指柏丹娜根本冇話事權。筆者想講，柏丹娜只係在野黨黨魁，但係佢嘅反移民立場，其實都係反映咗部分英國人嘅想法；唔計保守黨，極右派英國改革黨一樣係反移民，睇返之前大選嘅新聞，改革黨直頭係主打反移民牌，最激嘅倡議，甚至係拒絕非必要嘅技術移民。喺唔同黨派都有反移民聲音嘅背景下，再睇梁振英嘅分析，就更加唔係冇道理。
雖然BNO人士喺英國屬於一個較為特別嘅群體，但筆者認為，部分英國人所反對嘅，唔止係某個族群嘅移民或者難民，而係普遍地反對大部分移民；之前英國有騷亂，有啲移英港人都擔心自己會被針對埋一份，亦有移民港人指出，自己深深感受到英國嘅種族歧視問題嚴重。英國今日可以反難民，可以反對穆斯林，邊有人可以肯定，移英港人、BNO持有者唔係「下一個」呢？
近幾日，英國有人上街示威，聲稱要抗議中國駐英使館遷址計劃，好明顯，矛頭係指向中國，而且有唔少移英港人參與。一班移英港人，絕對係「選擇性示威人士」，英國反移民示威好難見到佢哋，英國反政府示威又好難見到佢哋，但關於中國事嘅就即刻衝出嚟，到底係咩心態？當移英港人去到英國，都不忘自己「反中使命」，只能夠講，佢哋中嘅黑暴之毒，實在太深喇！
收藏
取消收藏
分享
