竄英阮民安自爆已返港　網民嘲諷「旅行扮流亡」

【點新聞報道】靠黃上位嘅「奀星」阮民安，竄往英國數月便已返港，惹來不少網民嘲諷「無錢而且無技能就要返嚟香港，做佢嘅『香港人呃香港人』業務」、「自稱坐政治監，實際衰詐騙嘅人去旅行扮流亡」、「從未見過一個受政治迫害嘅人，可以彈岀彈入」、「唔捨得香港賽馬會」、「佢太掛住馬會啦」、「仲有蠢人課金比佢。」

話說阮民安喺去年5月在fb發文公告天下已移民英國，聲稱相信有生之年都不會/不能再回去呢個我最愛的香港了，但估唔到佢嘅有生之年喺2025年初就已到喇。皆因他在上月28日發文，話自己真係已經返咗嚟香港啦，但就死撐指「返嚟嘅原因係我原來俾食環署告緊」喎。有網民留言揶揄「原來已經死咗，再第二生」、「佢已經『重生』咗喇！！！」。

阮民安表示由於太掛住香港嘅美食，返港後就到港九新界周圍咁去食好西，仲打卡PO上網「呃Like」，指「您哋都知道喺英國要搵性價比高又好食嘅壽司係幾難架呵？」、「我任您走勻全世界搵，真係得香港先最好食」，睇嚟佢喺英國真係冇啖好食。

阮民安亦不忘繼續扮「孝子」，話返港最重要是探望爸爸，不過，有網民就發現他連爸爸的歲數都搞不清，指阮民安2024年6月曾發帖指收到76歲爸爸的近照，惟他日前發帖指爸爸已經80歲了，被網民直斥「成日騙子扮孝子」。