文/稀思路
個別香港人係有趣嘅，佢哋會認為有咩問題，無論訴求係咪合理，「上街」就係解決問題嘅方法；但係隨住「上街」行為開始有阻路同暴力元素，之前部分港人「上街」，已經變成破壞，甚至演變成打砸搶燒，黑暴運動就係一個例子。最近，一大班移英港人上街，反對中國喺倫敦起大使館，以為英國係「示威友善」嘅地方？錯喇，就算冇暴力行為，一樣可以照鎖照拉！有啲人以為自己示威大晒，但放諸四海，法律才是檢驗標準。
話說8日，據報有幾千人喺倫敦「上街」，反對中國喺當地興建新大使館，一大班包括移英港人在內嘅人，好似「好耐無過示威癮」咁，群起而出出嚟示威，甚至佔用埋馬路。期間，有示威者被英國警員警告要以《公眾秩序法》（Public Order Act）第14條拘捕佢，現場就發生混亂，之後相關人士同其他示威人士都有人被捕；根據英國警方嘅講法，當日拘捕咗兩人，其中一名林姓男子被控阻差辦公及違反《公眾秩序法》第14條，會喺下月10日上庭。
引用返關注當地港人嘅媒體講法，「今次倫敦警方處理集會的手法，跟過往處理有港人參與的示威及集會明顯不同 ... 今次反對中國超級大使館集會，警方非常大陣仗，除了倫敦警察廳（Met Police）派出大量警力，擁有獨立警力的金融城也派出倫敦市警察（City of London Police）進行聯防部署 ... 警方又預早架起鐵馬劃出示威區，在處理上明顯與參與者處於矛盾與對立 ... 集會人士一旦站出馬路會立即遭警察喝止，並警告會用《第14條》（Section 14）作拘捕。」點樣理解呢段報道？嚟個還原基本步，即係英國警方嚴陣以待移英港人示威，因為覺得示威者係搞事囉！
講開英國嘅《公眾秩序法》，主要立法內容包括賦予警方更大權力嚴格限制抗議時間、地點和人數，同時擴大警方「預防性逮捕」權力等等，英國近年再立法，原本係為針對英國政府而示威同破壞嘅人士，依家將類似嘅示威處理手法同新法例用嚟應對移英港人示威者，移英港人唔需要諗太多，就係覺得你哋似滋事分子！英國唔歡迎移民，亦唔歡迎「上街」滋事嘅人，BNO唔係免死金牌，他日如果主力反移民嘅政黨喺英國上台，到時BNO是什麼，真係一大疑問。
可能移英港人唔算好留意世界大事，特朗普再次上任美國總統前，已經開始同自己盟友「打架」，歐盟、英國等近年開始修補同中國嘅關係，亦實屬合乎情理嘅事，中共中央政治局委員兼外長王毅日前喺倫敦同英國外相林德偉舉行第10次中英戰略對話，指當今世界局勢更加動盪，中英兩個大國選擇對話合作，符合世界發展大勢。其實，英國工黨去年重掌政權後，以改善對中國關係作為主要外交政策之一，去年10月，林德偉訪問北京；去年11月，英國首相施紀賢（斯塔默）與國家主席習近平喺巴西G20峰會會晤。筆者曾經講過，當中國同英國等西方國家改善關係，寄居喺英國等地方嘅漢奸就最危險，仲玩「反中亂港」？小心燒着自己！
收藏
取消收藏
分享
