文/張津賢
最近，相信大家都收到咗唔少新年祝福訊息。不知大家有冇試過用AI生成圖片或影片嚟送上新年祝賀呢？隨住人工智能技術急速發展，「文字生成影片」（Text-to-VideoGeneration）成為近年科技界炙手可熱的話題。呢種技術可以將簡單嘅文字描述轉化為生動嘅動態畫面，令影片製作變得更快捷、更靈活，極大提升創作效率。
目前，兩款最具代表性嘅AI影片生成工具係Sora同可靈（Kling）。Sora由OpenAI開發，主打高畫質畫面同細膩敘事能力，非常適合製作短片、廣告同產品介紹。而快手AI團隊推出的可靈則更專注於多場景與長片創作，令電影、電視劇等需要複雜敘事嘅影片創作變得更加輕鬆。
文字生成影片技術並非單純取代傳統影像創作，而係為創作者提供新工具。以前拍片需要大量人力同時間，從劇本寫作、場景搭建到後期剪輯，每個步驟都涉及不同專業範疇。現時，透過AI代理人，創作者只需輸入一段文字描述，系統便能夠自動生產影片，大大縮短創作時間，減少成本，甚至讓更多對影像製作毫無經驗嘅人都可以輕鬆入門。
Sora嘅技術優勢在於畫質與細節表現，它透過生成對抗網絡（GAN）同深度學習技術，打造出媲美專業攝影作品的效果，光影、角色表情等細節都十分出色。同時，Sora擅長理解複雜文本，能夠將故事邏輯清晰地轉化為影像，對於品牌宣傳、短片故事創作非常適合。而可靈則更強調長片製作能力，能夠自動生成多場景內容，支援電影級別的故事架構，特別適合影視創作人使用。
雖然AI影片生成技術帶來咗極大便利，但同時亦衝擊咗傳統創作模式，令創作者角色面臨轉變。技術降低門檻，令更多人可以進入影片創作領域，但亦因此造成內容質素參差不齊。加上AI係依靠數據學習，當所有人都使用相似技術時，創作出來的作品可能會缺乏獨特性，甚至產生同質化問題。此外，AI雖然能夠快速生成影片，但創意、情感同藝術深度仍然需要人類去掌控。
人工智能並非取代創作者，而係成為輔助工具。創作者可以利用AI快速生成草稿或者測試新想法，但最終影片嘅靈魂同感染力仍然依賴人類嘅情感投入。Sora同可靈展示咗AI技術喺創意領域嘅可能性，但點樣喺技術高效性與藝術表達之間取得平衡，將會成為創作者未來嘅重要課題。
隨住AI技術持續進步，文字生成影片有機會更進一步提升個性化程度，例如讓AI依據創作者風格調整畫面、剪輯節奏，甚至自動配音，為觀眾提供更沉浸式嘅體驗。不過，呢項技術亦帶嚟一系列新問題，例如版權問題、假資訊泛濫等，都需要企業同開發者制定相應嘅規範。
文字生成影片技術改變咗內容創作方式，令影像製作變得更快、更容易，並為不同領域帶來全新機會。無論係品牌行銷、教育培訓，定係影視創作，AI影片技術都為創作者提供咗前所未有嘅可能性。但真正能夠打動人心嘅作品，仍然需要人類去賦予文化深度同情感共鳴。未來，人工智能同創作者將會以「人機協作」形式共存，結合技術與創意，創造更具價值同影響力的作品。
(作者為聯想集團企業方案經理、工聯會地區幹事)
收藏
取消收藏
分享
