折墮周小龍窮到燶　家徒四壁冇錢供車

【點新聞報道】走佬去英國、已執笠的童裝連鎖店Chickeeduck老闆周小龍，近日在社交平台自爆財政出現問題，要大屋搬細屋後，更連環出Po賣慘，晒出家徒四壁的照片，自嘲瞓單人床，坐一張凳仔睇電影，又話自己再冇能力供車喎。

正密謀2028年攞咗英國護照後回流返港的周小龍，昨日連環出Po賣慘，首先話自己出生於小康家庭，形容「大屋搬細屋，令我要過返好似我單身時候嘅生活」。他貼出新居的擺設，房間只有一張床褥連枕頭棉被，旁邊有一盞燈和盒裝紙巾，另一邊廂則只有一張凳和小小的豆袋梳化，話「其實瞓單人床有瞓單人床嘅樂趣，坐一張凳仔睇電影；套戲都係一樣咁好睇，仲冇咁容易瞓着覺添」。

另有個帖文則貼出車房一輛車也沒有，話「我再冇能力供車（但係我仍然好鍾意車）」，指自己有好多洗車工具，有興趣人士可以聯絡佢。之不過，邊有咁大隻蛤乸隨街跳，佢喺hashtag寫明要收錢「#講明先個JetWash要錢㗎 #講明先個電車叉電器要錢㗎」。

正所謂有「有咁耐風流有咁耐折墮」，不少網民留言揶揄「不久後，會瞓街」、「希望佢遲啲連張單人床同凳仔都同需要」、「呢啲pk想扮可憐等手足好忘記佢，刷下存在感啫」、「似係扮窮跟住又有錢途」。