【點新聞報道】城巴2023年底公布陸續為巴士站牌換上全新面貌，然而新站牌設計卻被批「難睇」，有乘客及網民均反映新站牌的路線號碼比舊版縮細及出現「撞色」問題，從遠方難以看清，批評設計倒退，「當你個牌係驗眼個啲海報呀？」
據悉，相比以往新巴及城巴的舊版巴士站牌注重放大巴士號碼的設計，新站牌的路線號碼明顯縮細及出現普通路線黃格黑字與黃色牌「撞色」問題。部分大型轉乘站或巴士總站的站牌亦設有月台編號，不過市民似乎不太受落，指出「月台A」、「月台B」字眼令人混淆，「未見過有人會用月台形容巴士站位置，唔知仲以為係港鐵」，「字體亦比巴士號碼大，俾鬼睇咩」。
近日社交平台Threads有網民再提及事件，發城巴新舊巴士站牌圖片作對比，直指「邊款清晰一目了然，本身啲線個number同目的地大大隻，轉咗新版之後細咗好多，塊牌嘅長度又係咁長，淨係黐過新logo係塊舊牌上面咪算囉」，又發起網上民調問網民「大家認為邊款好睇啲呢」，結果有1770人投票，93%均屬意舊款站牌，只有7%支持新站牌。
帖文引起城巴Threads官方賬號小編現身，留言回應「每個人考慮嘅點唔同啦！由設計到審批，到最後出來嘅結果，肯定經過多層考慮，一個設計亦不可能滿足晒所有人。咁既然改變唔到，與其執着好定唔好，不如慢慢適應新嘅事物囉！」
城巴回應隨即引發網民反擊批評，直言「睇得好辛苦」，「事實係新不如舊咯」，「Design就係為咗改善同要user friendly，但而家90%幾嘅user都同你講好睇但唔實用，不如你哋趁未換晒再改改佢啦」，「轉咗新版目的地太細，有等於冇」，「首先第一件事你哋公司個設計一定冇考慮過視障人士或者老人家睇唔睇得到，明明應該將最應該照顧群組擺喺top priority，我唔知你哋公司個多重考慮其實係考慮緊乜嘢，係咁強調自己改唔到叫人慢慢適應新事物，擺到明意見接受態度照舊」。
城巴小編及後再回應，「小編喺度統一回覆啦，大家係巴士用家，我都係！喺呢條串文大家所發表嘅觀點，作為用家當然能夠理解。事實上，新站旗由推出以來，大家嘅各種觀點或評論我亦有留意，在適當時機同場合下亦有如實向相關部門反映；但最終決定係點，又並不是小編能所左右（我不能向大家保證什麼，否則我就不是小編啦！）當中絕對有一種無力感，但無論如何，都歡迎大家發表對站旗嘅意見，相信團結就有力量，希望累積夠多嘅大眾意見，便可以帶來改變，那怕是緩慢的、丁點的……只要是持續的改善，那就是好。」
（點新聞記者報道）
收藏
取消收藏
分享
