文/稀思路
國安逃犯許智峯、羅冠聰等人潛逃外國，又一邊喺網上平台籌款，筆者好早就講過，如果有人以任何方式金援佢哋，都有可能會觸犯香港國安法，例如佢哋喺眾籌平台籌錢，有人以為「純贊助」而畀錢佢哋，隨時跌入法網。最近，由另一國安逃犯袁弓夷搞嘅所謂「香港議會」，正準備舉行「選舉」，筆者想講，如果有人諗住貪得意去參與佢哋嘅選舉，其實客觀效果，就係等同於主動觸犯法律。禍港政客擺個台出嚟引人犯罪，如果有人執意要參加，亦係「主動申請」犯法。
據悉，由所謂海外港人籌組嘅「香港議會選舉」，上個月初已經開始「提名」，而「提名期」會延長至4月中，投票日期就係5月；有所謂「參選人」就表示選舉延後係因為要畀人學習、適應參選程序，所以報名期延長咗，而投票日期亦有成大半個月。喺新聞報道中，筆者仲見到疑似會參選嘅「勇武派」人士，話要喺海外建立武裝力量，「推動海外港人接受軍事訓練 ...」睇到呢度，筆者真係忍唔住笑咗！
首先，筆者要講香港有立法會、區議會，但憲制之內，絕對沒有所謂「香港議會」，「香港議會」嘅本質，就係一班攬炒派基於不同原因離開香港，有被通緝嘅，亦有移民嘅，一班人去到海外「搞事」，發起「香港議會」扮議政，其實最終目的就係想撼動、顛覆政權，佢哋參選好，其他人支持佢哋都好，都隨時可能犯法，所以海外港人，如果係奉公守法嘅，不要參選，亦不應投票。
「香港議會」嘅主要搞手——袁弓夷，讀者上網搜查下佢嘅資料，會睇到佢因為涉嫌觸犯勾結外國或者境外勢力危害國家安全罪、顛覆國家政權罪而被香港警方通緝，佢喺2020年6月9日離港，根據案情，佢除咗請求外國對香港特別行政區政府官員及司法人員進行「制裁」，以及對香港特別行政區採取其他敵對行動；另一罪行就在於，佢籌組「香港議會」、發動「公投」，以圖實施「自決」及顛覆國家政權。由此可見，如果加入、參與袁弓夷嘅禍港活動，真係隨時惹禍上身。
袁弓夷以至「香港議會」嘅所謂參選人，唔計佢哋有一日可能會被外國遺棄、遣返，佢哋未必諗過會返香港，但係其他海外港人、香港人就唔同，如果無參與黑暴、攬炒，參與佢哋嘅所謂「選舉」，其實就係參與非法活動；由佢哋延長提名或投票期可見，佢哋嘅「選舉」似乎不太受歡迎，但筆者都係想提醒下，各位港人/海外港人，千萬不要以身試法！
筆者喺網上睇到個列表，見到疑似「香港議會」嘅所謂參選人或候選人，當中大部分人名都未聽過，所謂政治聯繫方面，甚至連「旺角鳩嗚團」都有，有啲團體名字就包含「香港民主建國」。講到香港，從來只屬一國，就係中華人民共和國，袁弓夷等人搞所謂「香港議會」，係一錯再錯之舉；筆者認為佢哋只識得反中亂港，罪不可恕。
收藏
取消收藏
分享
