羨慕在港友人升職　移加港男頓感迷茫：索性放棄返香港算！

【點新聞報道】正所謂「條路自己揀，扒街唔好喊」！有移民加拿大港男在網上發文，指日前回港與朋友聚會，發現他們對於自己的事業和人生規劃清晰，反觀自己卻對前路迷茫，直言「如果過多幾年都無方向，會唔會索性放棄返香港算！」。

有移民加拿大港男在連登討論區以「已移民，返完香港有感」為題發帖，指自己移居加拿大2年，用Stream B（加拿大1年工作經歷）申請永居。之前曾在香港工作過2年，到加拿大後能從事本行，結識到了新的遊玩同伴，形容「生活品質不錯」。

然而，樓主上月首次回港與朋友聚會，聊起香港與加拿大的文化和生活差異，他發現朋友「對自己人生條路好清楚」，特別在工作、升職、考牌方面「個個都好有目標」。樓主認為，若自己留在香港，其職業規劃亦會同朋友一樣清晰。

樓主表示，回到加拿大後再檢視自己後，感覺好迷茫，「覺得自己好似咩都冇，短期目標係等PR」，惟長遠來說，卻不知道如何在事業上有所增值。樓主直言「如果過多幾年都無方向，會唔會索性放棄返香港算！」，遂發文問網民意見。

帖文引起網民熱議，「如果知自己係普通人就早d返香港，如果唔係career輸同年起碼5年，唔好彩永遠做低層」、「返香港喇，有朋友同你一樣諗法，而家返嚟開心晒」、「你本身無大志，無planning，留香港都一樣，我由香港去英國都係一樣，又係考牌、升職、學嘢」、「PR完返香港搵目標囉」、「加拿大工作同上進心同香港唔同，若要生活好，就加入佢地齊齊做廢人等退休」。