筆是機場｜一次200萬元的「英國旅行」

文/稀思路

香港人，極度喜歡去旅行，返內地探索祖國風光，去日本瘋狂購物，玩盡啲去個極光之旅，可能一人5萬元；再玩盡啲，去埋南極，筆者上網見到有旅行團索價接近18萬元。如果用20萬元報一次旅行團，相信筆者加讀者都會覺得係「天價」，但如果去一次「長途英國旅行」，要用超過200萬元，讀者又點睇？筆者只能講三句：「點解嘅？」「真係㗎？」「你好叻呀！」

最近，筆者上網睇到單新聞，都分唔清係可悲定可笑，話說最近有人喺網上發文，話佢嘅朋友賣咗自住樓，帶咗300萬港元同家人移民英國，但係3年過後，用咗200幾萬元，得返幾十萬元，都係難以維持生計，迫於無奈，只好回流香港「重新開始」，發文者感嘆，呢個「簡直是現代香港人的悲歌」！

但係「悲歌」仲未完結，發文者嘅朋友返到香港，又要馬上面對工作同租樓問題，打點好啲嘢，又要接返喺英國嘅家人回港，錢冇咗，屋冇咗，以前喺香港份人工又搵唔返，筆者就覺得，200幾萬元，其實係買咗場「夢」，如果可以用啲錢去旅行，唔算好多，夠事主去十幾次南極啫。

筆者成日都講，移民係自己決定，移民之後生活好與壞，都只好接受自己選擇嘅結果；某程度上，幾年前嘅移民潮，係有人誇大政治問題，稱「香港唔掂」、「外國很好」，結果香港就越嚟越穩定，外國就越來越亂。大約兩星期前，先有傳媒道英國伯明瀚市嘅垃圾工人因為人工同工作條件問題，發起無限期罷工，令到城市垃圾積壓，引發公共衞生危機；之前，反移民示威、各行業罷工又頻頻喺英國發生，當初帶頭要「出走香港」啲政客，筆者想問下佢哋「有咩高見」？

其實對於移民問題，讀者仲可以攞個放大鏡，將唔同地方嘅情況都睇睇，然後攞個更全面嘅判斷。例如，近期就有移民加拿大嘅港人，工作簽證到期但仍未有永居身份，陷入進退兩難局面；喺美國，有一啲支持巴勒斯坦嘅外藉學生，直頭被撤銷「綠卡」資格。由美國到加拿大再到英國等，其實反移民係大勢所趨，如果香港人以為自己去到其他地方受到歡迎，有冇諗過外國歡迎嘅，只係你哋啲錢，而唔係你哋嘅才能或專業呢！

隨住黑暴過去，而且日子越來越長，英美等「五眼聯盟」，已經完全沒有要理會香港移民嘅所謂政治需要，近排亦出現一種勢頭，係美國以外嘅西方國家開始修補同中國嘅雙邊關係。當外國開始漠視港人移民，而港人移民又唔夠錢繼續喺外國繼續「燒」，榨乾榨淨後，可能就係返香港從零開始……咁做係咪值得，移民人士可以深思，筆者始終認為，會支持中國人的，從來只有中國人。