緬甸地震｜強震波及泰國　蔡一傑陳鍵鋒等急報平安

【點新聞報道】緬甸昨日（28日）發生7.9級地震，泰國多區有明顯震感，曼谷有一棟正在施工的摩天大樓全座倒塌。定居曼谷的羅敏莊及胡慧沖於昨日先報平安，原來蔡一傑、陳鍵鋒及關楚耀的太太Joann事發時亦身在當地。

陳鍵鋒去年到泰國曼谷學廚藝，他在IG限時動態上載身在曼谷街頭的自拍照及留言「多謝大家關心，報個平安」。蔡一傑事發時身在酒店房，他拍下房門及吊燈不斷搖晃的片段並說：「巧遇泰國第一次地震，好彩我住2樓走得快。」片段中，蔡一傑說：「地震呀！搖緊呀！嘩，第一次泰國地震呀，嘩，好搖呀，我成個人都搖緊。」

蔡一傑之後離開2樓的酒店房，到街上暫避。他拍攝街上人流眾多的情況：「所有人都走到去街上，唔敢喺啲Building裏面。依家所有人都向一個方向走，行去另一個方面，因為有一啲Building啱啱建起，驚佢會冧，一冧就好麻煩。所有民眾都冇車返屋企，BTS站、商場、食肆都閂曬，周街都係人，個個都返唔到屋企。」

關楚耀的太太Joann亦拍下當地的市面情況，她說：「嚇死了，一落車見到全部人都跑，我哋以為隨機斬人，原來地震。Hope everybody stay safe！好不容易今日冇咁咳出門口，真係一落車就地震。BTS close曬，7-11都唔俾入。去冰島已經全國紅色警報，曼谷依家又緊急狀態。」

Joann返回酒店後再次發文報平安：「頭先喺酒店lobby等咗好耐，唔俾上房，好多人着住揼骨衫就逃亡，有好多人鞋都冇着，有好多游完水淨係着條泳褲。報個平安先，點解我呢幾次去旅行都好似歷險咁，諗住返鄉下都可以遇到曼谷百年一遇嘅地震，我真係黑腳嚟……返上房，我見我啲化妝品冇跌曬落地以為OK，原來廁所埲牆出面裂曬……入邊啲瓷磚都鬆鬆地。」

（點新聞特約記者陳惠芳報道）