筆是機場｜英國如支持港人　何不直接給BNO港人永居身份？

文/稀思路

過去百多年，西方國家都有一套論述，就係民主、自由，只有「西方有」；人權、法治，都係得「西方有」，任何非西方制度，都會被西方國家圍攻，如果唔係西方聯盟嘅一分子，更會受到針對同打壓。喺呢個背景下，曾經殖民管治過香港嘅英國，亦定期對香港指手畫腳，例如透過所謂《香港半年報告》（Six-monthly report on Hong Kong），不斷抹黑香港。當中有一點，筆者必須重申，就係英國一邊稱香港國安法執法有問題，但自己喺另一邊又加強「國家安全法」，呢種雙重標準，會唔會太可笑呢？

每次見到英國嘅《香港半年報告》，都會覺得英國政府「又講呢啲」，一如之前嘅「半年報告」，香港國安法執行情況都會被抹黑，例如今次「半年報告」，又再一次提到「35+顛覆案」、黎智英以及《立場新聞》案被告；英國要求特區政府釋放黎智英等人，話佢哋係「政治犯」，但係如果危害國家安全嘅係「政治犯」，咁英國係咪都有好多「政治犯」？

自香港國安法實施以來，英美等國就不斷抹黑，又指黑暴運動以來，仲有幾千人被捕而未被起訴，藉此攻擊香港嘅法治狀況。講開黑暴運動，其實黎智英、「35+顛覆案」被告等，全部都有參與其中，讀者們有冇發現一個盲點，就係英國政府等提到黑暴，只會講或要求釋放黎智英等人，但就唔會譴責黎智英等人支持、煽動黑暴；嚟個換位思考，如果黎智英喺英國，又公開煽動反政府，可能黎智英都會因為英國嘅新《國家安全法案》而被捕。

當英國仲喺度講《中英聯合聲明》時，其實《中英聯合聲明》嘅內容，已經透過基本法去落實，《中英聯合聲明》係歷史文件，英國對香港唔需要講咩監察或責任。英國最好嘅做法，就係唔好再借機干預香港特區嘅事務；如果英國真係咁是非分明，咁發生喺香港嘅黑暴，以及發生喺英國嘅暴亂，本質都係透過示威、暴力行為去反政府，英國政府唔畀市民示威反對自己，但又支持部分港人用示威、暴力反對特區政府，條線點分？標準係點？唔該英國搞清楚先！

有一點比較有趣，就係英國政府強調會繼續支持港人，維持BNO計劃，為香港人提供「安全的家園」，「無論今日或未來，都會與港人同行」，如果英國咁支持港人，又真正承認BNO持有者嘅英國海外國民身份，點解唔直接畀BNO持有者永久居英權？要BNO持有者用幾年時間，喺英國花盡金錢先最後決定佢哋有冇英國永久居留身份？英國政府要嘅，係BNO持有者嘅錢，定係人？

「與港人同行」，呢句口號係咪熟口熟面？當然啦，黑暴運動時，外國政客都話「與港人同行」，幾年過去，流落海外嘅港人，近況如何？筆者上星期篇文，就寫過有港人移英，幾年時間用咗超過200萬元，但最後要回流香港；其他喺美國、加拿大嘅港人，有啲無得續簽簽證，有啲想申請政治庇護都未有消息。如果真係「與港人同行」，又點會留難港人？口號永遠可以叫得響亮，但行動起上嚟，根本就當流落海外嘅港人係外人，甚至係從骨子裏排拒嘅「外國人」。